Москваҕа Улуу Кыайыы 75 сылыгар анаммыт үгэс быһыытынан ыытыллар Кыайыы параада хайаан да ыытыллыаҕа.
edersaas.ru
Бу маннык иһитиннэриини Кириэмил пресс-сэкирэтээрэ Дмитрий Песков киин тэлэбиидэнньэ Пиэрибэй ханаалыгар муус устар 11 күнүгэр иһитиннэрбитин туһунан «Парламентскай хаһыат» суруйар.
Бу иннинэ бырааһынньыктааҕы тэрээһиннэри, ол иһигэр Кыайыы параада, «Өлбөт үйэлээх пуолка» тэрээһиннэрэ ыытыллалларын туһунан туох да быһаарыы суоҕа. Дмитрий Песков «бүтэһиктээх иһитиннэрии коронавирус эпидиэмийэтэ хайдах тарҕанарыттан тутулуктаныаҕа, араас варианнары үөрэтии бара турар» диэн бэлиэтээтэ.
«Ол эрээри мин биири этиэх тустаахпын: туох да мунаарыыта суох, Кыайыы параада ыытыллыаҕа. Мин чопчу ыам ыйын 9 күнүгэр ыытыллыаҕын билбэппин эрээри, суолталаах Улуу Кыайыы бырааһынньыга хайаан да бэлиэтэниэҕэ. Улуу Кыайыы күнэ биһиэхэ олус суолталаахх — бу биһиги дойдубут историята», — диэн эттэ Дмитрий Песков.
Оборона министиэристибэтин бэрэстэбиитэлэ, генерал-майор Игорь Конашенков Улуу Кыайыы параадын Москваҕа ыытыыга бэлэмнэнии былаан быһыытынан бара турар диэн иһитиннэрбитэ.
Муус устар 11 күнүнээҕи туругунан Арассыыйаҕа коронавируһунан 13,5 тыһ. киһи ыарыйда. Онтон 8 852 киһи Москваҕа ыалдьыбыта бэлиэтэннэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — СИА саайтыттан.