«Муома» айылҕа пааркатынан Кыайыы 75 сылыгар анаммыт эспэдииссийэ айанныыр.
Бу эспэдииссийэни Саха сирин Ис дьыалаҕа министиэристибэтин бэтэрээннэрин түмсүүтэ, Нуучча географическай уопсастыбатын эрэгийиэннээҕи салаата, өрөспүүбүлүкэҕэ спортивнай туризмынан, альпинизмынан дьарыктанар Федерациялар былааннаабыттар. Sakha.gov.ru бэлиэтээн суруйбуттарынан, тэрээһин Аҕа дойду уоттаах сэриитигэр Улуу Кыайыыны ситиспит сэбиэскэй норуокка сүгүрүйүү, ытыктабыл бэлиэтигэр ананар.
Айаҥҥа туруммут 12 киһилээх эспэдииссийэни үөрүйэхтээх турист, өрөспүүбүлүкэтээҕи спортивнай туризм Федерациятын бэрэстэбиитэлэ Георгий Цыпандин салайар. Эспэдииссийэ Муома улууһугар Победа хайаҕа тиийэр соруктаах. Бэлиэтээн суруйбуттарынан, 120 килэмиэтири сатыы, Муома өрүһүнэн уонна салааларынан 340 килэмиэтири катамаранынан бараллар. Бу айаннарыгар кинилэри «Муома» айылҕа пааркатын ыстаарсай госиниспиэктэрэ Антон Корякин арыаллыыр. Эспэдииссийэ кыттыылаахтара этэҥҥэ тиийэн, Победа хайаҕа Кыайыы Знамятын күөрэччи көтөҕөр, устуоруйаҕа киирэр түгэни кэрэһилиир табылыыссаны бэлиэ быһыытынан хаалларар былааннаахтар.
+1
+1
+1
+1
+1
+1
+1