Кыайыы Уопсастыба

Улуу Кыайыы 75 сыла. АГИКИ уонна музей анимационнай киинэ оҥордулар



АГИКИ устудьуоннара уонна Емельян Ярославскай аатынан музей кэлэктиибэ анимационнай киинэ оҥордулар.

Култуура уонна ускуустуба Акртикатааҕы судаарыстыбаннай институтун «живопись уонна графика» кафедратын устудьуоннара уонна Ем.Ярославскай аатынан хотугу норуоттар историяларын уонна култуураларын холбоһуктаах музейа  «Учуутал Н.В.Егоров суруктарыгар сэрии уонна эйэ» («Война и мир в письмах учителя Егорова Н.В.») диэн, Улуу Кыайыы 75 сылынан олус интэриэһинэй анимационнай киинэни көмөлөөн оҥордулар. Бу туһунан үөрүүлээх сонунун АГИКИ пресс-сулууспата иһитиннэрдэ.
Киинэни оҥорорго сыл аҥаара барбыт. Бу кэм устатыгар АГИКИ преподавателлэрэ уонна устудьуоннара туох да төлөбүрэ суох буор-босхо, ис санааларыттан турунан туран киинэҕэ хартыыналары оҥорууга үлэлэспиттэр.
Бырайыак куратора, график-худуоһунньук, Арассыыйа худуоһунньуктарын сойууһун чилиэнэ, доцент, живопись уонна графика кафедратын сэбиэдиссэйэ Туйаара Шапошникова эдэр худуоһунньук кыргыттар бырайыакка кыттыбыттарын этэр. Байыаннай дьайыылары, сэрии сэбин-сэбиргэлин бөлөх салайааччыта, доцент, Арассыыйа худуоһунньуктарын сойууһун чилиэнэ, СӨ ускуустубатын үтүөлээх диэйэтэлэ Дьулустан Бойтунов уруһуйдаабыт.
«Интэриэһинэй үлэ буолла. Элбэх көстүү  киирэр композициятын оҥоро үөрүйэхтээх Ж-15  бэһис кууруһун устудьуоннара Прудецкая Дайаана, Петрова Сардаана, Федотова Люба оҥордулар. Улахан үлэни толордулар. Онон улахан сыал-сорук туруоруллубутун, устудьуоннарбыт бэйэлэрэ толкуйдаан оҥорбуттара үөрдэр», — диэн Туйаара Шапошникова санаатын үллэстэр.
Музей малын-суолун көрөр-харайар Надежда Торговкина: «Биһиэхэ 200 кэриҥэ сурук уонна хас да хаартыска баар. Бу суруктары тыыннааҕымсытан көрдөрүүгэ АГИКИ устудьуоннара уонна преподавателлэрэ көмөлөстүлэр. Киинэ сүрүн идиэйэтэ — уоттаах, кырыктаах сэриигэ киһи бэйэ бодотун, сиэрин сүтэрбэккэ, Киһи быһыытынан хаалыыта. Бу биһиги аан бастакы кыттыгас улахан бырайыакпыт, — диэтэ.
 Учуутал Н.В.Егоров дьылҕатын, олоҕун суолун туһунан дьикти үчүгэй, уруһуйунан ситэриллибит-хоторуллубут хамсыыр хартыынаны — киинэни Ем.Ярославскай аатынан музей ютуб-ханаалыгар  https://www.youtube.com/watch?v=9sqBsnGSEbg киирэн көрүөххүтүн сөп.

Ыспыраапка: 

Егоров Николай Васильевич – Аҕа дойду сэриитин кыттыылааҕа, Кыһыл Сулус уордьаннаах, 5 бойобуой мэтээллээх уонна Үрдүкү Главнокомандующайтан 13 Махтал суруктаах, Ленин, Үлэ Кыһыл Знамята уордьаннар кавалердара,  Саха АССР уонна РСФСР  оскуолаларын үтүөлээх учуутала, САССР уонна РСФСР норуот үөрэҕириитин туйгуна.  

Н.В.Егоров 1903 сыллаахха ахсынньы 3 күнүгэр Бүлүү уокуругар Куорамыкы сэлиэнньэтигэр төрөөбүт. Педагогическай үлэтин 1922 сыллаахтан саҕалаабыт.  1929-1932 сс. Таатта оройуонугар Э.К.Пекарскай аатынан Игидэй оскуолатын салайбыт. Кини манна үлэлии сылдьан билиминэн уонна методиканан дьарыктаммыт. 1942 — 1945 сс. Кыһыл Аармыйа кэккэтигэр сулууспалаабыт. Рядовойтан саҕалаан отделение, взвод командира буолар. Егоров Н.В. 230-с гвардейскай стрелковай полкаҕа сулууспалыыр, Орловскай — Курскай тоҕойунан сэриилэспит, Сталинград иһин кыргыспыт, , Украинаны, Молдавияны, Болгарияны, Румынияны, Чехословакияны, Польшаны, Венгрияны босхолоспут хорсун-хоодуот байыас сэрии бүтүүтүгэр Австрияҕа тиийбит.

0
0

Санааҕын суруй