Култуура Маны аах Уопсастыба

«Улуу Кудаҥсаны» болуоссакка көрдөрдүлэр

Арассыыйа национальнай тыйаатырдарын бастакы кэнгириэһэ “Улуу Кудаҥса” испэктээкили болуоссакка көрдөрүүттэн саҕаланна. Саха тыйаатырын иннигэр дьон-сэргэ тоҕуоруһан, Олоҥхо тыйаатыра туруорбут “Улуу Кудаҥсатын” көрдүлэр.

Испэктээкил саҕаланыан иннинэ судаарыстыбаннай сүбэһит Андрей Борисов санаатын үллэһиннэ:

Бу манна инники эрээккэ кэнгириэскэ кэлбит уонна ЮНЕСКО чыпчаал айымньыларын көрдөрөр ыалдьыттарбыт олороллор. Бу Арассыыйаҕа аан бастакытын тэриллэр кэнгириэс Саха сиригэр буолбута улахан чиэс уонна бочуот. Национальнай тыйаатырдар сайдыыларын, жанрдарын элбэтиини, о.д.а. боппуруостары ырытыһыахпыт.

Бу “Улуу Кудаҥса” улуу айымньы буолар, сыанаҕа анаан туруоруллубута. Ол эрээри, биирдэ Греция амфитеатрыгар оонньоон турардаахпыт. Бу Олоҥхо тыйаатырын эдэр артыыстара толорор испэктээкиллэрэ маастар-кылаас быһыытынынан ыытыллар, — диэн кини быһааран кэпсээтэ.

“Улуу Кудаҥсаны” көрөөрү, дьон-сэргэ бөҕө тоҕуоруста. Куйаас күн сыралҕана да кинилэри чаҕыппата.

Үс эдэр артыыс Кудаҥса эдэр, орто саастаах уонна кырдьыбыт, мөлтөөбүт уобарастарын арыйдылар. Ол курдук, эдэр эрдэҕинээҕитин – Владимир Михалев, орто саастааҕы – Дмитрий Алексеев, кырдьыбытын Дмитрий Хоютанов, оттон Чаачыгыр Таас Ойууну Гаврил Менкяров оонньоотулар. Ордук Менкяров уонна Хоютанов уустук, ыарахан оруоллары итэҕэтиилээхтик арыйдылар.

Испэктээкил бүппүтүн кэннэ, артыыстар Андрей Борисов салалтатынан Ойуунускай пааматынньыгар баран, сүгүрүйүү сиэрин-туомун толордулар. Тэрээһин Орджоникидзе болуоссатыгар тэнийбит улахан оһуохайынан түмүктэннэ. Манна ааһан испит, сынньана сылдьар дьон, араас омуктар бары кыттыстылар. Артыыстары кытары хаартыскаҕа түһэн, кэпсэтэн, атаардылар.

 Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

0
0
Telegram @edersaas20