Саха АССР 100 сылыгар анаан “Пути великих свершений” документальнай киинэ “Дойти до края” тиһигин премьератын көрдөрүү буолуоҕа.
Муус устар 26 күнүгэр киэһэ 9 чаастан, Ил Дархан Айсен Николаевы кытары быһа эпиир кэнниттэн, “Саха” НКИХ ханаалыгар көрдөрүөхтэрэ. Муус устар 27 күнүгэр “Азия” киинэ тыйаатырын “Дубай” саалатыгар киэһэ 5 чаастан көстүөҕэ. Киириитэ босхо.
Элбэх сиэрийэлээх “Пути великих свершений” диэн научнай-популярнай киинэ Арассыыйа судаарыстыбата Илиҥҥи Сибиир, Уһук Илин, Аляска уонна Хотугу Америка арҕааҥҥы кытылын баһылаабыттарын туһунан кэпсиир. Документальнай киинэ сүрүн идиэйэтэ – бу улуу историческай дьайыыга Саха сирин, кини олохтоох норуоттарын оруолларын сырдатыы буолар.
«Дойти до края. Сибирский континент» диэн бастакы киинэҕэ 40 сыл кэрчиктээх улуу географическай арыйыылар тустарынан көрдөрүллэр. Сүрүн дьоруой – Евразия саамай уһук сирин арыйбыт хаһаак Семен Дежнев. Бу киинэни устуу 2021 сылтан Айсен Николаев сорудаҕынан саҕаламмыта. Былырыын сайын Дьокуускай, Өлүөхүмэ, Таатта, Уус Алдан, Хаҥалас улуустарыгар уһулбуттара. Чукоткаҕа Дежнев тумулугар тиийэ сылдьыбыттара. Түмүктүүр устуу Таатта, Хаҥалас, Томпо, Өймөкөөн, Аллараа Халыма улуустарыгар буолбута.
Киинэни “Моя планета” ханаал “АМГ” тэрилтэтэ “Сахафильмы” уонна “ВГТРК” кытары оҥорбуттар. Сценарий ааптара – Александра Боровикова, оператор — Александр Меньшов, продюсер — Юрий Коваленко, уо.д.а.
Документальнай киинэ иккис чааһа улуу айанньыт, командор Витус Беринга ананар. Устуу кэлэр сылтан саҕаланыа.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru