Өрөспүүбүлүкэ күнүгэр “Сахамедиа” Саха сирин олохтоохторугар сыаналаах бэлэҕи оҥордо – бары судаарыстыбаннай оройуоннар уонна улуустар хаһыаттара биир куйаар ситимин былаһааккатыгар түмэр Ulus.media саайты бэлэмнээн таһаарда.
Ulus.media эрэдээктэрэ Полина Николаева бэлиэтээбитинэн, бу сонун иһитиннэрэр эйгэ улуустар хаһыаттарыгар уонна муниципалитеттарга иһитиннэрэр-биллэрэр үлэлэригэр сонун сүүрээни киллэриэҕэ. Саайты оҥорууга, биллэн турар, “Сахамедиа” холдинг иһинэн балтараа сыл устата үлэлэбит “Улуус олоҕо” (“Жизнь в районах”) бырайыак сүрүн олугу уурда. Саайт улуустар сонуннарын, суруналыыстар ырытыылаах ыстатыйаларын, “Улуус пааспарын” курдук киһи интэриэһин тардар рубрикалардаах буолуоҕа. Манна улуустааҕы хаһыаттар электроннай версияларын эмиэ ааҕыахха сөп. Ulus.media саайт аһыллыытынан суруналыыстар, уопсастыбанньыктар эҕэрдэ тыл бастыҥын эттилэр.
— Өрөспүүбүлүкэтээҕи суолталаах информационнай былаһаакка үс таһымҥа (улуус, регион, федеральнайы кытта норуоттар икки ардыларынааҕы) эппиэттиир буоллаҕына эрэ дьоҥҥо интэриэһи үөскэтэр. Хас биирдиибит тыа сириттэн төрүттээх буолан, бэйэбит уонна атын улуустар олохторун туһунан билиэхпитин олус баҕарабыт. Москваҕа, Санкт-Петербурга уонна да атын куораттарга сырыттахха, үгүс киһи бу маннык хайысхалаах интэриниэт-таһаарыылар баар буолаллара буоллар диэн этээччилэр. Онон үгүс киһи баҕа санаата бүгүн туолла. Мантан инньэ улуустартан хаачыстыбалаах сонуннары ааҕа, билэ олоруохпут, — диэн бэлиэтээтэ СӨ Сибээс уонна информационнай технология сайдыытын миниистирэ Александр Борисов.
“Сахамедиа” холдинг салайааччыта Роман Мандзяк сонун интернет-таһаарыы тутулун билиһиннэрдэ уонна саайт үтүө өрүттэрин холобурдаата:
— Биллэн турар, саҥа сүрэхтэммит улуус хаһыаттарын саайта туһата үгүс. Элбэхтэн биири холобурдаатахха, бу туһугар электроннай библиотеканан буолара саарбаҕа суох. Ол эбэтэр манна улуус хаһыаттарын электроннай версиялара баар буолуоҕа. Баара суоҕа 8 эрэ оройуоҥҥа электроннай сайт баар эбит буоллаҕына, билигин өрөспүүбүлүкэ 34 улууһун хаһыаттарын саайт нөҥүө өрөспүүбүлүкэ барыта ааҕар кыахтаныаҕа. Ол эбэтэр улуустар хаһыаттара ааҕааччыларын биллэ элбэтиэхтэрэ, улуустар социальнай-экэнэмиичэскэй олохторугар интэриэс биллэ үөскүөҕэ.
Нам улууһуттан бу үөрүүлээх тэрээһиҥҥэ анаан кытта кэлбит уопсастыбанньык, соторутааҕыта тэриллибит “Арассыыйа дьахталларын туһугар” баартыйа чилиэнэ Вероника Винокурова санаатын бу курдук тиэртэ:
— Биһигини, дьахталлары, ийэлэри, бастатан туран, дьиэ кэргэммит туруктаах буолуута ордук долгутар. Ол иһин улуустартан социальнай хайысхалаах матырыйааллары ааҕыахпытын баҕарабыт. Билигин тыа сиригэр олоххо көхтөөх эдэр ийэлэр олус элбэхтэр. Кинилэр Сахабыт сирэ сайдыытыгар бэйэлэрин баҕа санааларынан кылааттарын киллэрэ сылдьаллар. Онон улуус хаһыаттарын суруналыыстарыттан ийэ, оҕо, дьиэ кэргэн туһунан хото сырдаталларыгар көрдөһүөхпүт этэ.
Дьааҥы улууһуттан төрүттээх куорат олохтооҕо, урбаанньыт, уопсастыбанньык Ольга Прудецкаяттан хоту улуус хаһыатын ааҕааччытын быһыытынан бэйэтин санаатын этэригэр көрдөстүм.
— Улуус уопсастыбаннай-бэлитиичэскэй олоҕор олус туһалаах саайт тахсыбыт. Дойдуларыттан тэйбит дьону сибээстиир ситим баара наһаа үчүгэй буолсу. Ол эрээри, мин санаабар, киин эрэ улуустар бу саайт сонуннарын кэмигэр ааҕа-билэ олоруохтара. Оттон хотугу улууска интэриниэт да, суотабай сибээс да мөлтөх буолан, ааҕар-билэр кыахтара син биир суох. Онон хоту улуустартан элбэх ырытыы ис хоһоонноох матырыйааллары ааҕыахпытын баҕарабыт, — диэн бэлиэтээтэ Ольга Борисовна.
Ulus.media саайт улуус олоҕун-дьаһаҕын инники күөҥҥэ таһааран, олохтоохтук сырдатан, тыа сирин киин куорат олохтоохторугар биллэ чугаһатыаҕа.
Елена ПОТОЦКАЯ, «Саха сирэ» хаһыат, edersaas.ru
Денис Попов уонна ааптар хаартыскаҕа түһэриилэрэ.