Ulus.media: Саха сиригэр өрөспүүбүлүкэ оройуоннааҕы хаһыаттарын холбоһуктаах саайта аһыллар
Өрөспүүбүлүкэ күнүгэр, муус устар 27 күнүгэр, “Сахамедиа” өрөспүүбүлүкэ олохтоохторугар бэлэх оҥорор – бары судаарыстыбаннай оройуоннар уонна улуустар хаһыаттарын биир Куйаар ситимин-былаһааккатыгар түмэр Ulus.media саайты таһаарар. Бу иһитиннэрэр эйгэ Уһук Илин сиригэр-уотугар кимиэхэ да майгыннаабат уонна муниципалитеттарга иһитиннэрэр-биллэрэр үлэлэригэр таһыччы саҥа кыаҕы арыйар.
Ulus.media эрэдээктэрэ Полина Николаева этэринэн, саайты оҥорууга “Улуус олоҕо” (“Жизнь в районах”) бырайыак үтүө уопута тирэх буолла. Бу бырайыак “Сахамедиа” холдинга 2016 сыл күһүнүттэн олоххо киирбитэ, салайааччынан үлэлээбит Полина Николаева маныаха сүрүннүүр оруолу бу үлэҕэ оройуон хаһыаттара ылбыттарын бэлиэтээтэ.
— Оройуон хаһыаттарын эрэдээктэрдэрин өйөбүллэринэн биһиги бырайыакпыт бэйэтин сайдыытыгар саҥа таһымҥа таҕыста уонна бүтүн өрөспүүбүлүкэтээҕи улахан саайтка диэри үүннэ. Ulus.media Саха сирин оройуоннарын прессатын сайдыытыгар өрө көтүүнэн буолуоҕа уонна аудиторияларын биллэрдик кэҥэтиэҕэ. Кистэл буолбатах, холбоһуктаах портал суох буолан, үксүгэр оройуоннар олохторун туһунан токурутуулаах иһитиннэрии тарҕанааччы. Оройуоннар олохтоохторун кырдьыктаах уонна хаачыстыбалаах иһитиннэриинэн хааччыйар наадатын бэлиэтээн туран. Ил Дархан Егор Борисов регион сибээскэ уонна иһитиннэрэр технологияларга министиэристибэтигэр маннык бырайыагы оҥороллоругар сорудахтаабыта. Саайт оройуон хаһыаттарыгар бэйэлэригэр туһалаах уонна ааҕааччыларыгар наадалаах буолуоҕа диэн эрэнэбин.
edersaas.ru