От ыйын 1 күнүгэр буолуохтаах, Конституцияҕа уларытыылары киллэрэр куоластааһын туһунан дьон-сэргэ бэйэтин санаатын үллэстэр.
edersaas.ru
Евгений Данилов, Сунтаар улууһун ыччат бэлиитикэтин отделын начаалынньыга:
— Конституцияҕа уларыйыылар киирэллэрин өйүүбүн. Кэм, олох уларыйан иһэр, ол сиэринэн сүрүн сокуоммут эмиэ уларыйыахтаах. Волонтердар хамсааһыннарын өйөөһүн, биэнсийэ, хамнас алын кээмэйэ сыллата үрдүүрэ – бу кэнэҕэс дьон олоҕун таһымын үрдэтиигэ, ыччат инникитигэр туһаайыллыбыт үлэ буолар.
Национальнай өрөспүүбүлүкэлэр култуураларын, төрүт тылларын-өстөрүн харыстааһын сокуонунан бигэргэнэн, Конституцияҕа киирбитэ үчүгэй. Дойдубут сокуоннара бэйэбит сирбитигэр-уоппутугар аан дойдутааҕы быраап нуормаларыттан ордук күүстээх буолуохтаахтар дии саныыбын.
Биһиги улууспутугар “Конституция волонтердара” диэн федеральнай хамсааһын үлэлии турар. Манна сүүрбэччэ ыччат баҕа өттүлэринэн үлэлииллэр. Волонтердар дьоҥҥо бу уларыйыылар тустарынан өйдөнөр курдук судургу тылынан кэпсээн, быһааран биэрэллэр, сырдатыы үлэтин ыыталлар.
От ыйын 1 күнүгэр мин хайаан да куоластыы барыаҕым, эдэр дьону ээл-дээл сылдьыбакка, дойдубутугар, хас биирдиибитигэр улахан суолталаах тэрээһиҥҥэ кыттыһаргытыгар ыҥырабын.
Ангелина Васильева, “Саха сирэ” хаһыат, edersaas.ru