«Народов много – страна одна!» диэн девизтээх аан дойдутааҕы «Улахан этнографическай диктант» быйыл номнуо алтыс төгүлүн ыытыллар. Аахсыйа сэтинньи 3 — 7 күннэригэр онлайн киэбинэн www.miretno.ru саайтка ыытыллыаҕа.
Диктант суруйуутугар Арассыыйа уонна тас дойдулар олохтоохторо кыттыахтарын сөп. Диктант нуучча, английскай, испанскай тылларынан суруллар.
Сорудахтар сэтинньи 3 күнүгэр Москва бириэмэтинэн 00.01 чааска www.miretno.ru саайтка бэчээттэниэхтэрэ.
Сорудахтар тест быһыытынан бэриллэллэр. Ол курдук:
— 20 ыйытыы – диктант федеральнай чааһа, кыттааччыларга барыларыгар биир кэлим буолар;
— 10 ыйытыы – диктант эрэгийиэннээҕи чааһа, РФ субъектарынан тус туһунан буолар;
— 30 ыйытыы – тас дойдуларга сыһыаннаах ыйытыылар. Тас дойдулартан кыттааччыларга барыларыгар биир кэлим буолар.
Диктаны суруйуу болдьоҕо 45 мүнүүтэ.
Санатан эттэххэ, «Улахан этнографическай диктант» аан бастаан 2016 сыллаахха сэтинньи 4 күнүгэр ыытыллыбыта. Онно Арассыыйа 90 тыһыынча кэриҥэ олохтооҕо кыттыбыта. Оттон былырыыҥҥы тэрээһиҥҥэ 1 742 661 киһи Арассыыйаттан уонна араас дойдулартан кыттыбыттара.
edersaas.ru