Сэтинньи 20 күнүгэр Хаҥалас улууһун Улахан Аан бөһүөлэгэр баһаарынай депо үөрүүлээх аһыллыыта буолла. Саха сирин нэһилиэктэригэр дьоһун көстүүлээх баһаарынай депо ахсааннаах. Улахан Аан баһаарынай депотун байыастара үлэлиир дьиэлэрин, гараастарын бэйэлэрэ тутан, дьон хайҕабылын, биһирэбилин ылыахтарын ыллылар.
Улахан Аан бөһүөлэгин баһаарынайдарын хамандыыра Максим Абрамов 2015 сыллаахха дуоһунаһыгар ананан кэлэригэр, мөлтөх туруктаах эргэ дьиэҕэ базаланан олорбуттар. Эдэр хамандыыр үлэтин саҕалыаҕыттан, саҥа дьиэ тутуутун туһунан толкуйдаммыт. 2016 сыл тохсунньутугар Улахан Аан баһаарынайдарыгар сабыс-саҥа «Урал» массыына биэрбиттэр. Массыыналара эргэ гараастарыгар баппат буолан, кыһалҕаттан тоҥорбуттар. Саҥа тимир көлөлөммүт дьон саҥа гараас уонна хонтуора тутуутун туруорсан киирэн барбыттар. Олохтоох дьаһалта көмөтүнэн, спонсордары булан, 2016 сыл ыам ыйыттан тутууну саҕалаабыттар. Баһаарынайдар чааһынай тиэхиньикэлэрин үлэлэтэн, тутууга бэйэлэрэ үлэлээбиттэр. Гараас тутуута ол сыл түмүктэммитэ. 2017 сылтан баһаарынай депо хонтуоратын гарааска сыһыары тутан быйыл бүтэрэн үөрүүлээх быһыыга-майгыга астылар. Дьиэ уотун, сылааһын тардыыга олохтоох дьон көмөлөспүттэр.
Баһаарынай депо уопсайа 55 кв.м иэннээх. Уоту умулларарга туттуллар тэриллэри уурар уонна аһыыр хостордоох, сибээс пууннаах, үөрэнэр кылаастаах. МПЧ-7 хамандыыра Максим Абрамов, караул салайааччылара Илья Тимофеев, Андрей Тимофеев, Михаил Макаров, Семен Федоров, суоппардар Петр Иванов, Станислав Третьяков, Евгений Трофимов, Ньургун Решетников, Егор Слепцов кыһамньыларынан үлэлиир усулуобуйалара тубуста.
Максим Абрамов, МПЧ-7 хамандыыра:
— Биһиги баһаарынай чааспытыгар 10 буолан үлэлиибит. 2015 сылтан усулуобуйабытын биллэ тупсардыбыт. Баһаарынайдар бары кыһамньылаахтык үлэлииллэр. Биһиги нэһилиэк уопсастыбаннай олоҕор куруутун кыттан иһэбит. Тематическай былаанынан бэйэ бэйэбитин үөрэтэбит. Мин хамандыыр быһыытынан караул салайааччыларын үөрэтэбин, оттон кинилэр суоппардарын үөрэтэллэр. Ити үөрэх ыксаллаах быһыыга-майгыга туһалаах буолар. Түгэнинэн туһанан, баһаарынай депобут тутуутугар көмөлөспүт дьоҥҥо барыларыгар махталбын тиэрдэбин.
Руслан Босиков, CӨ баһаарынай сулууспатын салайааччытын бастакы солбуйааччы:
— Бүгүн Улахан Аан нэһилиэгэр биир улахан тэрээһин буолла. Ол курдук, баһаарынай сулууспа улэһиттэрин күүһүнэн уонна нэһилиэк салалтатын көмөтүнэн баһаарынай чаас депота үлэҕэ киирдэ. Эбийиэк муниципальнай тэриллии бас билиитигэр киирэр. Баһаарынай сулууспа үлэһиттэрин күүстээх санааларынан, талбыт идэлэригэр бэриниилээх буоланнар, маннык эбийиэк тутулунна. Кэнники биэс сылга биһиги өрөспүүбүлүкэбитигэр уопсайа 9 эбийиэк тутуллан үлэҕэ киирдэ.
Маны таһынан, Эдьигээҥҥэ, Намҥа уонна Табаҕаҕа судаарыстыба бүддьүөтүттэн үбүлэнэн, үс типовой баһаарынай депо үлэҕэ киирдэ.
Николай Попов, «Саха сирэ» хаһыат, edersaas.ru