Сүрүн

Улахан Аан «Балаҕан» кэлээскэтэ ураты ичигэс тыыннаах

Бүгүн Дьокуускай куоракка сэлэлээн хаамыы киэргэлинэн, биллэн турар, кэлээскэлэр уонна кинилэр хаһаайыннара буоллулар.

Күүстээх тыалы билиммэккэ, бу кэмҥэ кинилэр эрэллээх хаххалара дьон сэргии көрөр көстүүлэринэн буолбуттарын, кэлээскэлэлэр хаһаайыттара хантан билиэхтэрэ баарай? Сорохтор элбэх киһиттэн аар буолбуттар, атыттар соһуйбуттуу оҥой-соҥой көрөллөр. Арааһа, туох эрэ суолталаах улахан тэрээһин  быһыылаах диэн, сэрэйэллэр быһыылаах.

Түгэнинэн сибээстээн параад кэнниттэн «Кэлээскэлэр парааттара» тэрээһини сүрүннээччи Ульяна Скрябина-Умсулҕан Хотунтан  тэрээһин туһунан кэпсииригэр көрдөстүм.

Аан бастаан бу тэрээһини 2014 сыллаахха тэрийбиппит. Кэлиҥҥи икки сылга коронавирус сыстыганнаах дьаҥынан сибээстээн, тохтуу сырыттыбыт. Быйыл Саха АССР төрүттэммитэ  100 сылынан  уонна Ийэ сылыгар анаан Дьиэ кэргэн бэстибээлин тэрийдибит. Ол тэрээһин чэрчитинэн 40-тан тахса кыттааччы баар.  Быйыл улуустарынан биир дойдулаахтар түмсүүлэригэр, дьаһалталарга тахсан чугастааҕы Мэҥэ Хаҥалас, Хаҥалас улуустарын кытыннардыбыт. Онон тэрээһиммит өрөспүүбүлкэтээҕи таһымнанна, — диэн санаатын үллэһиннэ тэрээһини сүрүннээччи.

Салгыы бастыҥ дии санаабыт кэлээскэм хаһаайыннарын кытта билсиэххэ.  Хаҥалас Улахан Ааныттан 5 ыйдаах икки игирэ уоллаах кыыһын кытта кэлбит Екатерина Аммосова салайааччыта Василий Дьячковскайы көмөлөһүннэрэн кэлбит. Василий Егорович дьиэ кэргэннэргэ өйөбүл киинин салайар эбит.

Улууспутуттан икки ыал кэлээскэтин аҕалан кытыннара сылдьабыт. Аммосовтар кэлээскэлэрин фанеранан оҥорон кырааскалаабыппыт. Талаҕынан тутуллар гына оҥорбуппут. Ыһан баран аҕаллыбыт. Цииркэ аттыгар кэлэн баран холбоотубут, — диэн кэпсиир Василий Дьячковскай.

Мин икки улахан кыргыттарым эмиэ игирэлэр. Инбэлиит оҕолоохпун. Уонна бу икки игирэчээннэрбин кытта биэс оҕолоохпун. Наһаа үчүгэй тэрээһин эбит. Аан бастакыбын кыттабын. Онон олохпор үтүө түгэн тосхойдо диэн үөрэ турабын, —  диэн санаатын үллэһиннэ дьолоох ийэ. Хомойуох иһин, кэлин билсэ сылдьыбытым, маннык бэртээхэй кэлээскэ бириистээх миэстэҕэ тиксибэтэх эбит…

Ол да буоллар, кылаабынайа, ыраах Улахан Аантан кэлбит икки игирэчээн уоллаах кыыс балаҕаннара саамай көстүүлээх буолан, үгүс киһи кинилэр аттыларыгар хаартыскаҕа түһэн, бу кэлээскэ ураты ичигэс тыына дьоллоох ыаллар альбомнарыгар бэлиэ күнү үйэтиттэҕэ.

 

Елена ПОТОЦКАЯ, «Саха сирэ» хаһыат. 

Ааптар хаартыскаҕа түһэриитэ уонна видеота.

 

0
1
Telegram Whatsapp