Улахан Аан сэлиэнньэтигэр (Хаҥалас улууһа) тутулла турар уһуйаан 75% бэлэм.
Нэһилиэк «Чэчир» түөлбэтигэр тутулла турар саҥа тэрилтэҕэ 90 оҕо сылдьара былааннанар. Тутуу «Тыа сирин кэлим сайыннарыы» федеральнай бырагыраама иитинэн, «Нэһилиэк аныгы көстүүтэ» тэрээһининэн ыытыллар.
Санатан эттэххэ, уһуйааны тутуу былырыын муус устартан саҕаламмыта. Улуус баһылыга Олег Иринеев бэлиэтииринэн, үлэ болдьох быһыытынан салҕанар. «Икки мэндиэмэннээх уһуйаан уопсай иэнэ 1 414,52 кв.м. Бүгүҥҥү күҥҥэ дьиэ хоруобуйата, тас өттүн оҥоһуута бүтэн, түннүктэр олордуллан, уу ситимэ тардыллан турар«, — диир кини. Маны сэргэ, дьиэ ис өттүгэр уота-күөһэ, септигэ тардыллыбыттар. Тутуу 75 % бэлэм.
Тэрилтэ аныгы тэрилинэн хааччыллыа: медицина хоһо, музыка уонна успуорт саалалара, икки мэндиэмэнинэн буфет, оҕолор бөлөхтөрүнэн сылдьар хосторо. Туспа хочуолунай 95% бэлэм.
Оскуолаҕа киириэн иннинээҕи саастаах оҕолор «Кыымчаан» уһуйааннара 1960 сылтан үлэлиир. Манна 28 киһи үлэлиириттэн, 12 педагог. Кырачааннарга саастарынан үс бөлөхтөөх: 1-2 араас саастаах кыра оҕолор бөлөхтөрүгэр 2 — 3,5 саастаах оҕолор сылдьаллар; орто бөлөххө — 3,5 — 5 диэри саастаахтар; улахан оҕолор бөлөхтөрүгэр 5 — 7 диэри саастаах оҕолор.
+1
+1
+1
+1
+1
+1
+1