Сүрүн Уопсастыба

Улахан Ааҥҥа Сайылык күнэ ыытылынна

Былырыын сайын Ил Дархан Айсен Николаев Хаҥалас улууһун Улахан Ааныгар тыа хаһаайыстыбатын үлэһиттэрин кытары көрсүһүүтүгэр Сайылык күнүн тэрийэр туһунан этии киирбитэ.

edersaas.ru

Өрөспүүбүлүкэ араас улуустарыттан түмсүбүт хаһаайыстыбалар салайааччылара, исписэлиистэрэ, учуонайдар салааны сайыннарыыга бэйэлэрин санааларын үллэстибиттэрэ. Бу көрсүһүүгэ киирбит этиилэргэ олоҕуран тыа хаһаайыстыбатын сайдыытын стратегиятын туһунан ыйаах ылыллыбыта. «Бөртө» сылгы собуота» ХЭУо салайааччыта Александр Павлов киллэрбит этиилэриттэн биирдэстэрэ эти-үүтү оҥорууга сайылык суолтатын үрдэтэр итиэннэ онно быһаччы үлэлии-хамсыы сылдьар дьон сыратыгар-харатыгар болҕомтону уурар сыалтан, өрөспүүбүлүкэҕэ Сайылык күнүн олохтооһун туһунан этэ. Айсен Сергеевич саха төрүт үгэһин сөргүтэр сиэрдээх этиини өйөөн, ыам ыйын 22 күнүн Сайылык күнүн бэлиэтиир туһунан ыйааҕы сэтинньи 6 күнүгэр бигэргэппитэ. Быйыл бастакытын бэлиэтэнэр өрөспүүбүлүкэтээҕи Сайылык күнэ ыам ыйын 22 күнүгэр Улахан Ааҥҥа Тыа хаһаайыстыбатын министиэристибэтин итиэннэ “Туймаада” ҮАПК тэрийиилэринэн, Сайылык күнүн ыһыаҕа ыһылынна.

Сайылык күнүн сэргэтин туруоруу

 

Култуура дьиэтигэр сарсыарда 9 чаас 30 мүн. тэриллибит племенной хаһаайыстыбалар сүбэ мунньахтарыгар ааспыт 2018 сыл түмүктэрэ ырытылынна итиэннэ быйылгы сыллаах соруктар туруорулуннулар, бастыҥ көрдөрүлээх хаһаайыстыбалар бэлиэтэннилэр. Ити кэмҥэ нэһилиэк ыһыахтыыр сиригэр «Туймаада» ҮАПК иһинэн агрохолдиҥҥа холбоспут хаһаайыстыбалар: «Бөртө» сылгы собуота», «Нөмүгү» агрофирма», «Өлүөхүмэ кыладабыайа», «Хатастааҕы сибиинньэ комплекса» ХЭУо-лар, «Сайсары» Бааһынай ырыынага» ААУо түһүлгэлэрин тартылар.

«Бөртө» быыстапката
Хатастааҕы сибиинньэ комплексын түһүлгэтэ

Сайылык күнүгэр анаммыт үөрүүлээх тэрээһин күнүс 11 чаас 30 мүн. саҕаланна. Битииһит кыргыттары, уолаттары арыалдьыттанан түһүлгэҕэ Алгысчыт киирэн Сайылык күнүн арыйар алгыһы эттэ, Ынахсыт тардыытын сиэрин-туомун толордо, аал уоту оттон саамал кымыһынан айах тутта, хороҕор муостаах үксүү, сыспай сиэллээх элбии туралларын, дьон-сэргэ этэҥҥэ олорорун тустарыгар түөрэх кэбистэ, оттон Айыы Намыһын хотуттар аар хатыҥҥа салама ыйаатылар. 

Ил Дархан ыйааҕынан сибээстээн, күн бүгүн өрөспүүбүлүкэ агропромышленнай комплексын иннигэр саҥа соруктар тураллар. Ол курдук, биһиги бэйэбит оҥорон таһаарбыт аспытынан-үөлбүтүнэн, бородууксуйабытынан хааччыллыы таһымын үрдэтиэхтээхпит. Онуоха үлэ эбийиэктэрин тутууну тэтимирдиэхтээхпит, 2024 сылга диэри сүүс мэхэньисээссийэлээх сайылыгы, 200 сылгы базатын тутуохтаахпыт, – диэтэ бырабыыталыстыба баһылыга Владимир Солодов түһүлгэ дьонун Сайылык күнүнэн эҕэрдэлииригэр. 

Ульяна Семенова (Бөртө) Бырабыыталыстыба Бочуотунай Грамотатынан бэлиэтэннэ

 

Владимир Солодов салгыы судаарыстыбаннай наҕараадалары туттартаата. Тыа хаһаайыстыбатыгар өр сыллаах үтүө суобастаах, таһаарыылаах үлэлэрэ сыаналанан осеменатор Мария Голомарева (Өлүөхүмэ) «Саха Өрөспүүбүлүкэтин тыатын хаһаайыстыбатын үтүөлээх үлэһитэ» аатынан, бостуук Александр Афанасьев (Бөртө), оператор Любовь Ефремова (Хатастааҕы сибиинньэ комплекса) «Гражданскай килбиэн» знагынан, биригэдьиир-зоотехник Ульяна Семенова (Бөртө) Бырабыыталыстыба Бочуотунай Грамотатынан бэлиэтэннилэр. Тиэндэри чиэстээхтик ааһан, сайылыктары уонна ыччат сүөһүнү уотар пууннары тутуу сертификаттарын 16 хаһаайыстыба: Аксиния Левина бааһынай хаһаайыстыбата (Кэбээйи), «I Күүлэт» кэпэрэтиип (Бүлүү), «Күндээдэ» агрофирма (Ньурба), «Сайдыы» кэпэрэтиип (Хаҥалас), «Тумул» кэпэрэтиип (Мэҥэ Хаҥалас) уо.д.а. туттулар. «Бөртө» сылгы собуота» ХЭУо икки сертификаты (сайылыкка уонна уотар пууҥҥа) ылла!

Тыа хаһаайыстыбатын миниистирэ Александр Атласов эҕэрдэ тылын кэнниттэн биэдэмистибэ наҕараадаларын туттарда. Ол курдук, чулуу ыанньыксыт Александр Громов (Нөмүгү) «АПК Бочуоттаах үлэһитэ», ыанньыксыттар Нина Анастатова (Бөртө), Ольга Семенихина (Өлүөхүмэ) «Саха Өрөспүүбүлүкэтин тыатын хаһаайыстыбатын туйгуна» уо.д.а. буоллулар.

Түһүлгэнэн олорон аһааһын кэнниттэн сахалыы илии-атах оонньуутугар, мас тардыһыыга, ох саанан ытыыга күрэхтэһиилэр, кэрэ аҥаардарга «Сайылык хотуна» куонкурус ыытылынна. Владимир Солодов «Бөртө» хаһаайыстыба базатын көрдө, агрооскуолаҕа уонна оҕо саадыгар сырытта, нэһилиэнньэни кытары көрүстэ.

Улахан Аан баһылыга Олег Иринеев ««Туймаада» ҮАПК генеральнай дириэктэрэ Петр Ефремовка Махтал сурук туттарар

 

Эрдэ этиллибитин курдук, «Туймаада» ҮАПК дьыалатын-куолутун оҥостон, бу күнтэн агрохолдинг быһыытынан үлэтин саҕалаата. Өрөспүүбүлүкэтээҕи Сайылык күнүн тэрээһинэ кини биир бастакы боччумнаах дьаһалынан буолла. Далааһыннаах былааннардаах дьоһун тэрилтэ инники үлэтигэр-хамнаһыгар ситиһиилэри баҕарыаҕыҥ!

Раиса Сибирякова, «Саха сирэ» edersaas.ru

1
0
Telegram @edersaas20

Добавить комментарий