1990-с сыллар ортолоругар эдэркээн Александр Самсонов—Айыы Уола саха эстрадатыгар соҕотохто чаҕылыйа түспүтэ. Кини «Ньургуйаана», «Сардаана», «Бэлэхтээ», «Уруһуйдуубун», о.д.а. дууһаны долгутар, сүрэҕи манньытар ырыаларын ыччат сонно иилэ хабан ылан, уостан түһэрбэккэ ыллыыр буолбута.
«Эдэр саас»» хаһыат дьоруойун Александр Самсоновы-Айыы Уолун улуус-улуус аайы күүтээччи, ыҥырааччы, кэнсиэр аайы кытыннарааччы үксээбитэ. Кини 1996 сыллаахха Дьокуускай куорат ыһыаҕар улахан кэнсиэри бэлэхтээбитэ. Ити сыл «Азия оҕолоро» норуоттар икки ардыларынааҕы спортивнай оонньуулар киэҥ-нэлэмэн түһүлгэлэригэр Арассыыйаҕа киэҥник биллэр «A’Studio» бөлөҕү кытары тэҥҥэ ыллаабыта-туойбута. «Эһиэхэ аныыбын» уонна «Санаабын этиэм» альбомнара атыыга былдьаһыгынан барбыттара. Саша 1998 сыллаахха СГУ (билиҥҥинэн ХИФУ) тыл уонна культура факультетыгар, культурология салаатыгар, үөрэххэ киирбитэ.
Айыы Уолун сырдык аатын кэриэстээн, билигин ырыа күөн күрэһэ үрдүк таһымнаахтык, тиһиктээхтик тэриллэн ыытыллар. Кини ырыаларын билиҥҥи кэм эдэр ыччата сэргээн, умсугуйан ыллыыр. Айыы Уолун ырыатыгар кэрэ, нарын үҥкүүлэр туруоруллаллар. Кини туһунан киинэ уһуллубута. Улахан Ааҥҥа сырдык аатын кэриэстээн пааматынньык туруоруллубута.
Оттон соторутааҕыта А.Е.Кулаковскай аатынан норуоттар доҕордоһууларын дьиэтигэр үлэлиир «Тойук» ансаамбыл салайааччыта Галина Гаврильевна Федорова Хаҥалас улууһугар Улахан Ааҥҥа М.Е. Васильева аатынан орто оскуолаҕа Айыы Уола аатынан ырыа оскуолатын тэрийдэ. Кулун тутар 3-7 күннэригэр бары кылаастарга Александр Самсонов ырыаларыгар маастар-кылаастар ыытылыннылар. Оҕолор улаханнык сэргээтилэр, сэҥээрдилэр. Нэһилиэк олохтоохторо улаханнык үөрдүлэр, долгуйдулар.
Хаартыска: СИА