Украина футболиһа Дзюбаны үтүктэн дьон айаҕар киирэн биэрдэ
Бу күннэргэ Финляндияҕа буола турар 19-гар диэри саастаах уолаттар ортолоругар футболга Европа чөмпүйэнээтигэр Франция хамаандата Украинаҕа 1:2 ахсаанынан хоттордо. Бастакы гол ааптарынан 17 саастаах Георгий Цитиашвили буолла.
Билигин Украинаҕа социальнай ситимнэргэ футболистара мээчиги хайдах киллэрбитин буолбакка, онно үөрүүтүн хайдах биллэрбитин киэҥник дьүүллэһэллэр. Быһата, Цитиашвили аан дойду чөмпүйэнээтигэр Артем Дзюба египтяннарга гол киллэрэн баран тириэньэрэ Станислав Черчесовка чиэс биэрбитин үтүктэн оҥорбут хамсаныытын сөбүлээбэтэх үгүс буолла. Ол курдук, суруналыыс Константин Андриюк фейсбукка украинец Цитиашвилига футболист эталонунан бельгиец де Брюйне, хорват Модрич, бэл киниттэн биир эрэ сылынан аҕа, ол эрээри номнуо улахан дьоҥҥо аан дойду чөмпүйүөнэ француз Мбаппе буолбакка, тоҕо эрэ чуо Дзюба буолбутун өйдөөбөтөҕүн суруйда. Цитиашвили ити хамсаныытынан Украина байыаннайдарын өйүүрүн биллэрдэ диэччилэр эмиэ көһүннүлэр.
Эдэр футболист бэйэтин инстаграмыгар тугу да гыналлара суох дьон ону-маны барытын суруйуохтарын син, оттон мин хамаандабын кытта кэлэр оонньууга бэлэмнэнэбин, итиннэ барытыгар болҕомтобун уурбаппын диэн хардарда.
Санатар буоллахха, 19-гар диэри саастаах уолаттар ортолоругар футболга Европа чөмпүйэнээтэ от ыйын 16-тан 29 күнүгэр диэри ыытыллар.
Роман ПОПОВ, «Саха сирэ» хаһыат, edersaas.ru
Хаартыска: Интэриниэттэн ылылынна