«Триумф» спортивнай комплекс кэлэр нэдиэлэттэн Арассыыйа бастыҥ кикбоксердарын көрсүөҕэ. Улахан дьон күрэхтэһэллэрин таһынан, оҕолор уонна юниордар эмиэ кыттыахтара. Биһиги өрөспүүбүлүкэбититтэн 22 оҕо кыттар. Кинилэри билигин юниордарга СӨ сүрүн тириэньэрэ Уйусхан Барашков дьарыктыы сылдьар. Дьиэтээҕи күрэхтэһии иннинэ сүрүн тириэньэри кытары кэпсэттим.
edersaas.ru
— Уйусхан Анатольевич, оҕолор бэлэмнэрэ хайдаҕый? Ким эмит миэстэлэһиэн сөп дуо?
— Бэлэммит үчүгэй. Ахсынньыттан саҕалаан күүскэ дьарыктанан саҕалаабыппыт. Ол иннинэ хамсык мэһэйдээн оҕолору мунньубакка сылдьыбыппыт. Сыл устата ыраахтан олорон дьарыктаммыттара. Онон ахсынньыга диэри хайдах ыйааһыннаах кэлэллэрин да билбэт этибит. Ол да буоллар, тохсунньуга маҥнайгы күрэхтэһиибитигэр, «Москва.Open» кыттан кэлбиппит. Олунньуга Уһук Илин күрэхтэһиитигэр Саха сириттэн 40-ча оҕо кыттыбытыттан, Арассыыйаҕа бастыҥнарын сүүмэрдээбиппит. Намтан уонна Бүлүүттэн биэстии, Ньурбаттан уонна Хатастан иккилии, Усуйаанаттан үс, Хаҥаластан икки, Уус Маайаттан биир оҕо өрөспүүбүлүкэ сүүмэрдэммит хамаандатыгар киирдилэр. Икки кыыстаахпыт. Кулун тутарга Читаҕа күрэхтэһэн кэлбиттэрэ.
Онон, оҕолор син күрэхтэһиилэргэ кыттан, уопутуран сылдьаллар. Кыахтарын сөпкө туһаннахтарына, миэстэлэһиэн сөптөөх оҕолор бааллар. Саха сиэринэн ааттаабаппын.
— Салалта тириэньэрдэр үлэлииллэригэр дьарык усулуобуйатын хайдах тэрийдэ?
— Тэрээһин үчүгэй. Спортивнай бэлэм киинэ оҕолору битэмиининэн хааччыйда, доруобуйаларын көрдө-иһиттэ. Аны дьарыктанар сирбит «Дохсуҥҥа», оттон олорор сирбит «Триумфка» буолан, күн аайы оптуобус таһар.
Улуус тириэньэрдэрэ көмөлөһөллөр. UFC бөҕөһө Григорий Попов маастар-кылаас биэрэн барбыта. Захар Румянцев, Иван Марков курдук тириэньэрдэри кытары үлэлэстибит. Уопсайынан, кикбоксинг тириэньэрдэрэ бары кэриэтэ уопсастыбанньыктар, энтузиаст дьон.
— Саха оҕолоро кикбоксиҥҥа дойду, аан дойду таһымыгар тахсыахтарын сөп дуо?
— Оҕо быластылыын курдук. Кини физиологиятын, этин-хаанын учуоттаан, ханнык баҕарар успуорка таһаарыахха сөп. Саха оҕото сотору-сотору ханна эрэ кыайбыта иһиллэр дии. Оттон чуолаан кикбоксины этэр буоллахха, манна анал дьарык саалата наада. Оҕолор уһулуччу үчүгэй турукка киирэллэригэр элбэх дьарыктыыр түмсүүлэр наадалар. Онуоха бу олимпийскай көрүҥ буолбатаҕа мэһэйдиир. Ол да буоллар, биһиги хаһааҥҥытааҕар да түмсүүлээхпит, хаһааҥҥытааҕар да үчүгэйдик дьарыктанныбыт.
Аны биһиги үксүн рингэ көрүҥнэрин эрэ сайыннарабыт. Дьиҥэ, рингэ таһынааҕы көрүҥнэр эмиэ бааллар. Онно да саха оҕото кыттар уонна ситиһиилэнэр кыахтаах.
— Оҕобун кикбоксинг сиэксийэтигэр биэрээри гыннахпына, ханна барабын?
— Дьокуускай куоракка «Триумфка» уонна «Дохсуҥҥа» кэлиэхтэрин сөп. Улуустарга, этэн аһарбытым курдук, энтузиаст дьонноох буоллахтарына, истиһэн тиийиэхтэрин сөп.
— Арассыыйа күрэхтэһиититтэн тугу кэтэһэҕин?
— Ким да эчэйии ылбакка, барыта этэҥҥэ аастын диэн баҕарабын. Атын эрэгийиэннэртэн да буоллун, ким күүстээх кыайдын. Бэйэм оҕолорум Арассыыйа сүүмэрдэммит хамаандатыгар киирэллэрэ буоллар диэн баҕа санаалаахпын.
— Уйусхан Анатольевич, эн баҕа санааларыҥ туоллуннар!
Виктория Бястинова, edersaas.ru, «Саха сирэ» хаһыат.
Хаартыска СИА.