Доруобуйа харыстабылын үлэhиттэрин идэлээх бырааhынньыктарынан бары үрүҥ халааттаах аанньаллары ис сүрэхпиттэн эҕэрдэлээн туран, бэйэм хаан- уруу эмчит идэлээх дьонум туhунан кэпсиэхпин баҕарабын.
edersaas.ru
Биhиги олоҥхо дойдута Һунтаар, уруккулуу ааттаттахха, Хочо сирин Арыылааҕын Уhун Күөлүттэн Уйбааныскалар диэн аймах буолабыт. Аҕабыт Уйбаан Иннэкиэнтийэбис Борокуоппайап маһы, тимири ыллатар уус, ийэбит Уйбааныска Таанньата диэнинэн биллэр бэрт амарах, истиҥ дууhалаах иистэнньэҥ бэрдэ этэ. Кинилэр 9 оҕолоро бары ыал буолан, отуттан тахса сиэн, биэс уонтан тахса хос сиэн, эбиитин хос-хос сиэннэрдээх халыҥ аймах буола тэнийэн иhэбит.
Дьэ, бу дьонтон «медицинскэй династия» диэн бочуоттаах ааты сүкпүт ыалынан Сэмиэнэптэр буолаллар. Аҕалара Владимир Егорович — фтизиатр быраас, ийэлэрэ Антонина Ивановна — акушерка, улахан кыыстара Татьяна —офтальматолог уонна эбии онколог быраас, орто кыыс Сардаана — психиатр- нарколог, оттон кыралара Марина — гинеколог. Эдьиийбит Антонина аҕыс кылаас кэнниттэн медицинскэй училищеҕа үөрэммитэ. Онон эрдэ үлэhит буолбута. Үлэтин төрөөбүт Арыылааҕын учаастактааҕы балыыhатыгар саҕалаабыт буолан, чугастааҕы үс нэhилиэги эт атаҕынан сатыы кэрийэ сылдьан үлэлиирэ.
Кинини Дьаархан, Маар Күөл, Аллыҥа кырдьаҕастара билигин да истиҥник ахтан ааhаллар. Владимир Егорович, Антонина Ивановна Российскай Федерация, Саха Өрөспүүбүлүкэтин доруобуйа харыстабылын туйгуннара. Сэмиэнэптэр билигин Өлөөн сис ыаллара.
Өссө хаан-уруу Уйбааныскалар аймахтан үрүҥ халааттаах аанньалларынан сиэн оҕолорбут буолаллар: Екатерина Ивановна — Дьокуускай 3 №-дээх поликлиникатын сиэстэрэтэ; Ньургун Николаевич — «Суhал көмө» ыстаансыйа биэссэрэ;
Любовь Борисовна — гериатрическай киин биэссэрэ; Туйаара Николаевна — эмиэ биэссэр.
Аны манна эбии эмиэ эмчит идэтин баhылаабыт кийииттэрбитин эбиэх: «Суhал көмө» ыстаансыйатын бырааhа Саргылана Владимировна, оптимитрист Юлия Петровна, акушерка идэлээх Мичийэ Тоокой.
Онон эмчиттэр идэлээх бырааhынньыктара биhиэхэ, Уйбааныскаларга улахан суолталаах күнүнэн буолар. Эмчит уустук үлэтин эппитинэн-хааммытынан билэр буолан, үрүҥ халааттаах аймах дьоммутунан киэн туттабыт!
«Саха сирэ хаһыат», edersaas.ru анаан
Венера СТЕПАНОВА, Сунтаар улууһа.