Сунтаар улууһун Элгээйи нэһилиэгэр историяҕа киирэр дьоро күн үүннэ.
edersaas.ru, Уйбаан Нуолур аатынан Элгээйи модельнай библиотеката
Сунтаар улууһун норуот үөрэҕириитин салаатыгар үтүө кылаатын киллэриспит, саха литературатыгар баай нэһилиэстибэни хаалларбыт СӨ оскуолаларын үтүөлээх учуутала, ССРС Суруйааччыларын союһун чилиэнэ, Сунтаар улууһун Ытык киһитэ, биир дойдулаахпыт Иван Герасимович Иванов — Уйбаан Нуолур төрөөбүтэ 90 сылынан, кини аатын сүгэр Элгээйи модельнай библиотека иннигэр киниэхэ аналлаах боруонсаттан кутуллубут өйдөбүнньүк бюст туруорулунна. Бу долгутуулаах дьоро күҥҥэ үөрүүнү үллэстэ элбэх киһи кэллэ. Нэһилиэк ветераннара, учууталлара, оскуола үөрэнээччилэрэ бу үөрүүгэ кыттыһан Уйбаан Нуолур суруйбут нэһилиэк өрөгөй ырыата буолбут «Элгээйи сиригэр» ырыаны дуораччы ыллаатылар. Бюст автордарынан Россия худ. чилиэнэ, СӨ үөрэҕириитин туйгуна скульптор Николай Дмитриевич уонна кини быраата скульптор Егор Гаврильевич Огоннеровтар буолаллар. Дьокуускай куоракка оҥоһуллан, Улан Удэҕэ кутуллан оҥоһуллубут. Алаас туһунан философскай көрүүлээх суруйааччы, улахан буукубаттан суруллар Учуутал олорбут сэмэй олоҕо, үлэтэ-хамнаһа, суруйан хаалларбыт айымньылара хас эмэ үйэлэри нөҥүөлээн кэлэр көлүөнэ ыччакка кэрэни кэрэһилии, үтүөнү үксэтэ, билии-сайдыы аартыгар ыҥыра туруоҕа. Бу бюст оҥоһуллан туруутугар үбүнэн көмөлөспүт Сунтаар улууһун, Элгээйи нэһилиэгин дьаһалталарыгар, Уйбаан Нуолур оҕолоругар улахан махталбытын тиэрдэбит.
edersaas.ru, Уйбаан Нуолур аатынан Элгээйи модельнай библиотеката