Саха сирин сүүмэрдэммит хамаандата Уһук Илин оонньууларыгар ситиһиилээхтик кытынна
![](https://edersaas.ru/wp-content/uploads/2019/09/a9ad9a4d-b70a-48f7-9c08-d200d7781ac7.jpg)
Балаҕан ыйын 3-6 күннэригэр Владивостокка V Илиҥҥи экэнэмиичэскэй форум чэрчитинэн бастакытын эрэгийиэннэр икки ардыларынааҕы «Уһук Илин оонньуулара» ыытылынна. Тэрээһини Арассыыйа спордун министиэристибэтэ, Россконгресс пуонда уонна Приморскай кыраай физкултуураҕа уонна спорка департамена иилээтилэр.
Оонньуулар бырагыраамаларыгар спорт уон көрүҥэ киирдэ, ол курдук: ГТО многоборьета, баскетбол, мини-футбол, канааты тардыһыы, дуобат, саахымат, гиирэ спорда, пляж волейбола, дартс уонна остуол тенниһэ.
Хамаандаҕа биир сүрүн усулуобуйанан былаас ситэриилээх уонна сокуону таһаарар уорганнарын салайааччылара кыттыахтаахтар диэн буолла. Онон, СӨ сүүмэрдэммит хамаандатыгар Саха сирин Физкултуураҕа уонна спорка миниистирэ Иннокентий Григорьев уонна Экэниэмикэ миниистирэ Майя Данилова киирэн күрэхтэстилэр. Миниистирдэр ГТО многоборьетыгар ситиһиилээхтик кытыннылар.
Үс күннээх күрэхтэһии түмүгэр Саха сирин хамаандатын ситиһиитэ маннык:
Максим Суханов (Баһылай Манчаары аатынан спорт национальнай көрүҥнэрин киинин инструктор-методиһа) — остуол тенниһигэр бастакы миэстэ;
Петр Макаров («Алмас» дириэктэрэ) — дартска бастакы миэстэ;
Гаврил Мохначевскай (Баһылай Манчаары аатынан спорт национальнай көрүҥнэрин киинин дириэктэрэ) — дуобакка иккис миэстэ;
Диана Степанова (СӨ тас сибээскэ уонна норуоттар дьыалаларыгар миниистири солбуйааччы) — дуобакка иккис миэстэ;
Валерий Протопопов (Уһук Илиҥҥэ СӨ бэрэстэбиитэлин солбуйааччы), Егор Максимов (Култуура министиэристибэтин сүрүн исписэлииһэ) — пляж волейболугар иккис миэстэ;
Сүүмэрдэммит хамаанда — канааты тардыһыыга иккис миэстэ;
Иннокентий Григорьев (Физкултуураҕа уонна спорка миниистир), Майя Данилова (Экэниэмикэ миниистирэ), Егор Ермолаев (урбаанньыт), Юлиана Харлампьева (аҕыйах ахсааннаах норуоттар тыйаатырдарын артыыһа), Гаврил Никифоров (уус) — ГТО многоборьетыгар иккис мисэтэ;
Владимир Николаев (аҕыйах ахсааннаах норуоттар тыйаатырдарын артыыһа) — дартска үһүс миэстэ;
Наталья Тюкавкина («Якутия» национальнай туристско-информационнай киин дириэктэрэ) — саахымакка үһүс миэстэ.
Инньэ гынан, уопсай түмүккэ Саха сирин хамаандата Приморскай кыраай уонна Бурятия өрөспүүбүлүкэтин кэнниттэн үһүс бириистээх миэстэҕэ тигистэ.
Бүгүн, балаҕан ыйын 17 күнүгэр, киэһэ 18.30 чаастан 2-с №-дээх Бырабыыталыстыба дьиэтин аактабай саалатыгар «Уһук Илин оонньууларын» түмүгүн таһаарыы буолуоҕа.
edersaas.ru