УФСИН «Үрүҥ эһэ» этэрээтин салайааччы Геннадий Камаев Арассыыйа атын эрэгийиэннэригэр уонна Саха сиригэр үлэлиир кэллиэгэлэрин холуобунай-ситэриилээх систиэмэ ураты аналлаах этэрээттэрэ тэриллибиттэрэ 30 сылынан эҕэрдэлиир.
Геннадий Камаев биир идэлээхтэригэр кытаанах доруобуйаны, үтүөнү, дьолу, этэҥҥэ буолууну баҕарарын уонна киэн туттарын этэр.
1990 сыл сэтинньи 13 күнэ ураты аналлаах этэрээттэр тэриллибит күннэринэн ааҕыллар.
Саха сиринээҕи «Үрүҥ эһэ» ураты аналлаах этэрээт суһал быһыыга-майгыга өрүү бэлэм, гражданнар олохторугар куттал суоһаабатын туһугар күннэтэ үлэлиир. Этэрээт үлэһиттэрэ бары сулууспалыы уонна байыаннай бэлэмнээхтэр. Ол курдук, кинилэр истэригэр краповай бэриэттээхтэр, успуорт маастардара, норуоттар икки ардыларынааҕы, арассыыйатааҕы күрэхтэһиилэр кыайыылаахтара бааллар.
Бүгүн, сэтинньи 12 күнүгэр, УФСИН уорганнарын ураты аналлаах отделларыгар аат уонна бэлиэ толкуйугар куонкурус финалын бүтэһик күнэ. Саха сиринээҕи «Үрүҥ эһэ» этэрээт бастакы түһүмэх кэнииттэн уон бастыҥнар кэккэлэригэр киирбитэ.
Куоластыыр туһуттан Арассыыйа УФСИН-ын «Инстаграмҥа» сирэйигэр киирэн, комментарийга «8» диэн хаалларыаххытын, итиэннэ «Телеграмҥа» эмиэ куоластыаххытын сөп.
УФСИН пресс-сулууспата.