Уон сыллаа5ыта Тааттаҕа олоҥхо эйгэтин төрүттээбит «Удьурҕай-Таатта» диэн олоҥхону толорооччулар этно-бөлөхтөрө тэриллибитэ. Бу түмсүү салайааччытынан Раиса Семеновна Маркова үлэлиир. Бу үөрүүлээх күҥҥэ кини СӨ култууратын туйгуна үрдүк ааты ылла. Этно-бөлөххө сылдьар дьон төрөөбүт тыл, олоҥхо уус-уран айымньы сайдарыгар уон сыл устата дьаныардаахтык үлэлэстилэр.
Этно-бөлөх салайааччыта, олоҥхону бар дьоҥҥо тарҕатар, уһуйар Раиса Семеновна Марковалыын кэпсэттибит.
Раиса Семеновна, Удьурҕай-Таатта бөлөх хайдах тэриллибитэй? Бу пандемия кэмигэр үбүлүөйгүтүн хайдах бэлиэтээтигит?
Бөлөхпүт 2011 с тэриллибитэ. Олоҥхо эйгэтигэр 2010 сыллаахха киирбитим, сэһэннээтэххэ уһун. «Удьурҕай” диэн ааттаан уон киһи буолан бастаан тэриллибиппит. Олоҥхону толорууну оччолорго сүрдээх кылгастык ирдииллэрэ. Саха сирин кэрийэ сылдьан көрдөххө, талааннаах, төрөөбүт тыл баайын-сүмэтин илдьэ сылдьар дьон элбэх. Биһиги бу бөлөх дьоно диэн сахалыы тылы-өһү, олоҥхону ааҕыыны таптааччылар буолабыт. Элбээтэр элбээн, билигин алтыспыт дьонум тыһыынчаттан таҕыста. Алтыһар дьоммун бастаан, саҕаланыытыгар эрэ кинилэр олоҥхону ааҕан атахтарыгар туруохтарыгар диэри саҕалааччы, тэрийээччи быһыытынан сылдьабын. Онтон бэйэлэрэ туспа аат-суол ылынан, сайдан туспа бараллар. Олоҥхоһуттар диэн саха дьонун толору талаанын хаһааммыт дьон буолаллар диэн бэлиэтиэхпин баҕарабын. Биһиги бу уон сыллаах үлэбит түмүгүн түһүлгэтэ куйаар ситиминэн буолла. Түмсүүбүт дьоно бары наҕараадаланнылар. Онон үлэлээбит үлэбит түмүктээх диэн этиэхпин баҕарабын. Татьяна Слепцова «За вклад развития народного творчества” диэн бочуотунай бэлиэ ылла. Ону сэргэ СӨ Олоҥхо ассоциациятыттан, култуура министиэристибэтиттэн, “Арчы” дьиэтиттэн, Улуус бэтэрээннэрин Сэбиэтиттэн, «Сарыал” Ытык Күөллээҕи норуот айымньытын дьиэтиттэн эҕэрдэ суруктары туттардылар. Онон ис сүрэхтэн үөрэн туран үлэм үөрүүтүн үллэһинним. Олоҥхону толоруу дьон-сэргэ ортотугар, Сахабыт сирин устун тэнийдин! Абылаҥнаах олоҥхо дорҕооно киһи ис кыаҕын уһугуннарар, киһи сүрүн күүһүрдэр.
Ульяна ЗАХАРОВА.
Хаартыскалар Раиса Маркова тус архыыбыттан туһанылыннылар