Томпо улууһун олохтоохторо Тыа хаһаайыстыбатын министиэристибэтин бырагыраамаларыгар көхтөөхтүк кытталлар. Ол курдук, 2016 сыллаахха киинтэн ыраах сытар Ударник учаастагыттан үс киһи “Саҥа саҕалыыр бааһынай хаһаайыстыба” федеральнай бырагыраама гранынан 1,5-лыы мөлүйүөн солкуобайдаах граннары ыланнар, сүөһү-сылгы иитэр үлэни-хамнаһы тэриммиттэрэ.
Быйыл улуус дьаһалтата көрбүт 100 тыһ. солк. субсидиятыгар тирэҕирэн, эдэр фермер Айаал Кузьмин сэндвич панелынан саҥа хотону туттан үлэҕэ киллэрдэ. 126 кв миэтэрэ иэннээх хотоҥҥо билигин 41 ынах сүөһү, ол иһигэр 17 ыанар ынах кыстаан турар. Айаал сайын дьонун кытары 50 туонна оту соҕотуопкалаабыта, онон сүөһүтүн итиэннэ 38 сылгытын кыстатар оттоох.
Евдокия Неустроева, «Саха сирэ» хаһыат, edersaas.ru