Удачнайдааҕы тэхиньиичэскэй кэллиэс устудьуоннара үтүө дьыаланы үксэтиһэллэр.
«80 үтүө дьыала» хамсааһын чэрчитинэн, устудьуоннар Удачнай куорат «Сад памяти» норуоттар икки ардыларынааҕы аахсыйаҕа кыттарга бэлэмнэнэригэр көмөлөстүлэр. Аахсыйа Улуу Кыайыы 75 сылыгар ананар.
Ыччаттар хас да күн устата саад буолуохтаах сири-уоту ыраастаатылар, үүнээйини олордорго бэлэмнээтилэр. Оттон аахсыйа саҕаламмыт үөрүүлээх уонна күүтүүлээх күнүгэр устудьуоннар уонна куорат олохтоохторо муһуннулар. Бу умнуллубат күн Удачнай куорат баһылыга Артур Приходько уонна Удачнайдааҕы ГОК дириэктэрэ Роман Денискин кыттыыны ылбыттара, бэлиэ күн суолтатын өссө үрдэттэ.
Мастары олордуу байыаннай ырыаларынан арыалламмыта тэрээһини киэркэттэ. Оттон аахсыйаҕа кэлбиттэр Аҕа дойдуну уоттаах сэрииттэн көмүскээбит, эйэлээх олоҕу уһансыбыт ытык дьонноругар муҥура суох махталларын, тапталларын, ытыктабылларын манна кыттыыларынан тиэртилэр. Устудьуоннар кэлин тапталлаах куораттарыгар үүнээйилээх кэрэ муннугу арыйыыга көмөлөспүттэрин, устуоруйаны кэнчээри ыччакка киэн туттан сэһэргиэхтэрэ. Мааны саадка дьон-сэргэ тоҕуоруһан эйэлээх олоҕу уһансыбыт ытык дьонноругар сүгүрүйүөхтэрэ. Оттон олордуллубут хас биирдии мас ким эрэ олоҕун, дьоруойдуу быһыытын саната туруоҕа.
«80 үтүө дьыала» аахсыйа кэллиэскэ ахсынньыга диэри салҕанар.
Светлана Любавина