Элбэх сыллар усталарыгар Удачнай киин болуоссата уларыйбакка кэллэ. Ааспыт сылга болуоссаты тупсарыыга үп тардар сыалтан Удачнай куорат судаарыстыбыннай бүддьүөттэн 35 мөл. солк. суумалаах субсидияны ылбыта. Субсидия көмөтүнэн болуоссаты саҥардыы бу сыл ортотуттан саҕаламмыта.
Балаҕан ыйын 9 күнүгэр болуоссат тупсарыыта хайдах тэтимнээхтик бара турарын өрөспүүбүлүкэ баһылыга Айсен Николаев билистэ.
Ыытыллыбыт күрэс түмүгүнэн талыллыбыт бэдэрээтчитинэн «Веста- А» ХЭО буолбут. Удачнай куорат киин болуоссатын тупсарыы үлэтигэр аспааллааһын, тротуар билиитэлэрин ууруу, кыра архитектурнай формалары туруоруу ыйыллыбыт. Буолуоссакка бэйэ бэйэлэрин кытта кирилиэстэринэн силбэһэр үс араас тырыбыналар туруохтара. Полиция дьиэтин өттүгэр бүрүллүүлээх, кыра архитектурнай элэмиэннэрдээх сир былааннаммыт. Болуоссат тупсарыытын бырайыагын СӨ Куорат эйгэтин ыйытыыларыгар компетенциялар киинин көмөтүнэн “Эйгэ” архитектурнай бюро оҥорбут.
Көрүү түмүгүнэн Айсен Николаев “Удачнай куоракка дьон сөбүлээн сынньанар сирдэрэ өссө биир бэлиэ сиринэн элбииһик” диэн бэлиэтээн эттэ.
Хаартыска: sakha.gov.ru