Удачнай — Харыйалаах — Өлөөн хайысхатынан оптика тардыллыаҕа
Олунньу 4 күнүгэр ситэриилээх былаас 2019 сыллааҕы отчуотун Өлөөн эбэҥки национальнай оройуонугар Өлөөн бөһүөлэккэ оҥордо. Оробуочай бөлөх салайааччыта, бастакы вице-премьер Алексей Колодезников былырыын аҕыс улуус Арктика оройуонугар киирэннэр, ол иһигэр өлөөннөр эмиэ судаарыстыбаннай көмөннөн толору туһаныахтара диэн бэлиэтээтэ.
edersaas.ru
Ил Дархан ыйааҕынан, кинилэр тырааныспар нолуогуттан босхоломмуттара, иэстэрэ сотуллубута. Маннык чэпчэтии сир нолуогар уонна чааһынай дьон баайыгар-дуолугар тарҕанар.
Ону таһынан, өрөспүүбүлүкэ иһигэр салгын суолунан социальнай суолталаах хайысхаларга сөмөлүөт тарыыба 70% диэри субсидияланар. Итинник бырагырааманан 2019 сылга муус устар 1 күнүттэн алтынньы 31 күнүгэр диэри Дьокуускай — Өлөөн — Дьокуускай икки ардыгар 373 киһи туһаммыт, онно 4,4 мөлүйүөн солкуобай туттуллубут. 2019 сылга Өлөөн улууһугар 962 киһи сөмөлүөтүнэн көтөрүгэр 15,9 мөлүйүөн солкуобай субсидия бэриллибит.
Итиэннэ былырыын Өлөөн бөһүөлэгэр икки саҥа хочуолунай, 198 миэстэлээх, киинэ көрдөрөр саалалаах “Илкит” этнокултуурунай киин тутуллубут. 4700 кВт кыамталаах ДЭС үлэҕэ киирбит.
СӨ бырабыыталыстыбата уонна «Ростелеком» сөбүлэһии түһэрсэннэр, Удачнай — Харыйалаах — Өлөөн хайысхатынан оптика түргэн интэриниэт 2020 сыл бүтүөр диэри тардыллыахтааҕын туһунан Алексей Колодезников эттэ.
2019 сылга өрөспүүбүлүкэҕэ 1600 км уһуннаах оптика ситимэ тардыллан, 50 нэһилиэк түргэн интэриниэккэ, аныгы сибээскэ холбонно. «Цифровой экэниэмикэ» национальнай бырайыак чэрчитинэн, улуустарга 318 социальнай эбийиэккэ интэриниэт киирдэ, онтон 218 оптика сыыдам сибээс. Ол туһунан СӨ бырабыыталыстыбатын уонна Ил Дархан пресс-сулууспата иһитиннэрэр.
«Саха сирэ», edersaas.ru