Учууталларга арыгыны утары уруоктары хайдах ыытар туһунан сэминээр буолла
Ааспыт нэдиэлэҕэ үөрэх үлэһиттэрин атырдьах ыйынааҕы мунньаҕын чэрчитинэн “Моделирование и проектирование воспитательной системы образовательной организации” диэн куурустар буолан аастылар.
edersaas.ru
Өрөспүүбүлүкэ 17 улууһуттан 53 учуутал “Оскуолаларга арыгыны утарыы тиэмэтин сөпкө үөрэтии мэтиэдикэтэ” диэн ааттаах сэминээргэ кытыннылар. Тэрээһини СӨ арыгы атыытын, лицензиялааһыны хонтруоллуур управление салайааччыта Матвей Лыткин уонна С.Н.Донской-II аатынан үөрэҕи сайыннарар уонна квалификацияны үрдэтэр институт ыыттылар. Ити туһунан СӨ арыгы атыытын, лицензиялааһыны хонтуруоллуур управление иһитиннэрэр.
Арыгыны утары уонна доруобуйа култууратын туһунан уруоктары оскуолаларга 2015 сылтан ыыталлар. СӨ үөрэҕин уонна наукатын министиэристибэтин исписэлиистэриттэн, арыгыны утарар чөл олохтоох уопсастыбаннай пропагандист-диэйэтэллэриттэн, Дьокуускай куорат 31 №-дээх оскуолатын учууталларыттан турар бөлөх быйыл Саха сирин усулуобуйатыгар анаан оҥоһуллубут бастакы уруоктары таҥпыттар. Үөрэтии тустаах мэтиэдьикэтин уопуттаах педагог Юлия Сергеевна Степанова оҥорбут. Оттон маны олоххо киллэрии тирэх киининэн маҥнайгынан Дьокуускай куорат 31 №-дээх оскуолата буолбут.
Тустаах мэтиэдьикэ уратытын туһунан сэминээри СӨ арыгы атыытын, лицензиялааһыны хонтруоллуур управление салайааччыта Матвей Лыткин итиэннэ мониторинг уонна иһитиннэрэр-анаалыстыыр үлэҕэ салаатын салайааччыта Ульяна Булдакова, “Трезвая Якутия”, “Якутия против алкоголизма” арыгыны утарар хамсааһын актыбыыстара Елена Шудря, Валентина Комиссарова, Ида Белых кэпсээтилэр. Оттон 31-с №-дээх оскуола социальнай педагога Светлана Афанасьева бэйэлэрин оскуолаларыгар үөрэтии уопутун билиһиннэрдэ.
“Саха сирэ” хаһыат, edersaas.ru