Учууталлар идэлэрин таһымын үрдэтиини – саҥалыы хараҕынан
СӨ бырабыыталыстыбатын бэрэссэдээтэлэ Владимир Солодов СӨ үөрэҕин уонна наукатын миниистирэ Владимир Егоров, Үөрэҕи сайыннарар уонна квалификацияны үрдэтэр институт үлэһиттэрэ кыттыылаах мунньаҕы ыытта.
Тэрээһиҥҥэ Москватааҕы “Современные образовательные концепции” тэрилтэ сүбэһитэ Юлия Петрова, “Оценка качества образования” тэрилтэ генеральнай дириэктэрэ Александр Костюк быһа сибээһинэн кытыннылар.
Мунньах С.Н.Донской-II аатынан СӨ Үөрэҕи сайыннарар уонна квалификацияны үрдэтэр институт үлэтин, инники сайдыытын боппуруоһугар ананна.
Бэрэсидьиэн Владимир Путин 2024 сылга уопсай үөрэхтээһин хаачыстыбатынан Арассыыйа 10 бастыҥ дойду кэккэтигэр киириэхтээх диэн сорук туруорбута. Онтон Ил Дархан Айсен Николаев Саха сирэ 15 бастыҥ субъект ахсааныгар хапсыахтаах диэн эппитэ.
Маныаха сүрүн хамсааһыны учууталлар оҥороллор. Ол иһин учууталлар идэлэрин таһымын үрдэтиигэ улахан болҕомто ууруллар. Атырдьах ыйыттан саҕалаан, үс төгүл дистанционнай уонна бэйэлэрэ миэстэтигэр тиийэн эспэримиэҥҥэ кыттыбыттар.
“Уопсай үөрэхтээһин үлэһиттэрин идэлэрин компетенцияларын хаачыстыбалаахтык тэрийии уонна толору сыаналааһын инники турар соруктартан биирдэстэрэ буолар. Быйыл бу үлэтин үмүрүтэн, эһиилги сылтан толору үлэлээн барыахтаахпыт”, — диэн Владимир Солодов бэлиэтээтэ.
Мунньахха институт дириэктэрэ Галина Алексеева уонна “Оценка качества образования” тэрилтэ генеральнай дириэктэрэ Александр Костюк эспэримиэн түмүгүн билиһиннэрдилэр, тустаах тэрилтэ инники сайдыытын кэпсэттилэр.
Людмила ПОПОВА, “Саха сирэ” хаһыат, edersaas.ru