Учуутал улуу Пушкиҥҥа аналлаах кэллиэксийэтиттэн билсиҥ (ВИДЕО)
Бүгүн – улуу суруйааччы Александр Пушкин төрөөбүт күнэ. Өлүөхүмэ улууһун Абаҕа орто оскуолатын учуутала, СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ, үлэ бэтэрээнэ Елена Молокотина Александр Пушкиҥҥа аналлаах баай кэллиэксийэлээх.
Елена Гавриловна нуучча тылын уонна литэрэтиирэтин учууталынан 40-ча сыл үлэлээбит. Учуутал буоларын быһыытынан уруккуттан кинигэни атыылаһар, мунньар эбит. Оттон чопчу улуу суруйааччыга аналлаах кэллиэксийэтэ 2018 сылтан саҕалааммыт.
— 2018 сыллаахха коллекционердар түмсүүлэрэ тэриллибитэ, бөлөхтөрүгэр киллэрбиттэрэ. Значоктары мунньарга санаммытым. Аны, тиэмэлэринэн наардыыр ордуга көстүбүтэ. Ол иһин, нуучча суруйааччыларын талыбытым. Ол эрээри, олус сэдэх эбит. Ити курдук, кыралаан саҕаламмыта. Билигин 300-чэкэ значоктаахпын. Онтон улахан аҥаара Пушкиҥҥа аналлаах. Эбии аккырыыккалары, кинигэлэри, иһити-хомуоһу атыылаһабын. Уопсайа, улуу суруйааччы тиэмэтигэр 500-тэн таҕыстаҕа буолуо.
Балартан саамай сэдэхтэринэн, өссө Магадаҥҥа устудьуоннуу сылдьан атыыласпыт, А.Пушкин айымньыларыттан киирбит, 1868 сыллаахха тахсыбыт, “Словесность в образах и разборах” (В.И. Водовозов) диэн кинигэ уонна 1887 сыллаахха бэчээттэммит “Евгений Онегин” романа, Толстой кинигэлэрэ буолаллар. Сүрүннээн үлэбэр туһанар кинигэлэрим. Пушкин тиэмэтигэр мунньарбын билэн, билигин Калининградтан Владивостокка диэри тиийэ сэдэх малы көрдөһөн буларга дьулуһаллар”, — диэн кэпсиир.
Итини таһынан, Елена Гавриловна чуорааннары, чыычаахтары мунньар. Сыллата кэллиэксийэтин хаҥатан иһэр. Арассыыйа араас куораттарыттан тиийэ биир интэриэстээх дьон үллэстэллэр. Үөрэнээччилэр ордук Александр Пушкин төрдүн-ууһун сэҥээрэллэрин этэр.
Е.Г. Молокотина кэллиэксийэтин манна көрүҥ.
Людмила ПОПОВА, “Саха сирэ” хаһыат, edersaas.ru