Учуутал миэстэтэ сүрүннээн тыа сиригэр баар

Ааптар: 
Бөлөххө киир:

Аҕыйах хонуктааҕыта үгэскэ кубулуйбут педагог миэстэтин дьаарбаҥката буолан ааста. СӨ Үөрэҕин уонна наукатын пресс-сулууспатын чахчытынан, тэрээһиҥҥэ 29 улуустан үөрэх тэрилтэлэрин бэрэстэбиитэллэрэ кыттыбыттар.

“Саха сирэ” хаһыат

Кэлэр үөрэх дьылыгар өрөспүүбүлүкэ үрдүнэн 800-чэкэ педагог ирдэнэр итинтэн 234 миэстэ Арктика уонна хоту улуустарга. Вакансия 70 бырыһыана тыа сиригэр баар эбит, онтон 500-тэн тахсата учуутал миэстэтэ. Миниистири бастакы солбуйааччы Ирина Любимова иһитиннэрбитинэн, сүрүннээн англичанин тылын, математика, алын кылаас, муусука учууталларын, уһуйаан иитээччилэрин миэстэлэрэ аһаҕас тураллар эбит.

Сунтаар улууһун Хадан орто оскуолатын дириэктэрэ Михаил Тимофеев: «Дьаарбаҥканы тэрийэллэрэ үчүгэй. Үөрэхтэрин бүтэрбит үгүс эдэр исписэлиис кэлэн ыйыталаста, урут үлэлии сылдьыбыт учууталлар даҕаны кэлэн туоһуластылар. Сүрүннээн киин улуустарга уонна Дьокуускайга хаала сатыыллар эбит. Мин көрдөхпүнэ, ыраах улуустарга барааччы аҕыйах. Быйылгы үөрэх дьылыгар биһиги оскуолабытыгар химия, биология, информатика учууталыгар наадыйабыт. Киинтэн ититиллэр уопсай дьиэлээхпит. Барыллаан үлэһит көстүөх курдук эрээри, чопчута биллэ илик. Сунтаар улахан улуус ахсааныгар киирэр, эһиилгиттэн учууталлары өйүүр “Земскэй учуутал” бырагыраама киирдэр, исписэлиистэр син үлэлии тиийиэх этилэр. Учуутал тиийбэтин сүрүн төрүөтэ, мин санаабар, хамнас кыра. Ол иһин эдэр дьон учууталлыахтарын баҕарбаттар, оскуолаҕа таласпаттар. Үлэһиккэ саамай сүрүнэ хамнас буоллаҕа», — диэн санаатын үллэстэр.

Кэлэр 2019-2020 үөрэх дьылыгар Сунтаар улууһун үрдүнэн 50-ча, ордук математика, история, физика, информатика учууталлара тиийбэттэр эбит. Дьиҥэр, Сунтаар өрөспүүбүлэ биир биллэр, сайдыылаах итиэннэ хоту улуустар курдук ыраах буолбатах, чугас сытар. Ол эрээри, ханнык баҕарар улууска курдук саастаах учууталлар бочуоттаах сынньалаҥҥа тахсар, эдэр исписэлиистэр дойдуларыгар төннөр итиэннэ киин сиргэ талаһар буолар, миэстэ сыллата тахса турар эбит.

Хадан оскуолата улуус кииниттэн баара-суоҕа сүүрбэччэ килэмиэтирдээх сиргэ сытар, суола-ииһэ даҕаны үчүгэй. Онон учууталлыан баҕалаах дьон тустаах оскуола итиэннэ, уопсайынан, аһаҕас миэстэ туһунан министиэристибэттэн, улуустааҕы үөрэх управлениеларыттан туоһулаһыаххытын сөп.

Людмила ПОПОВА, Саха сирэ хаһыат”, edersaas.ru

+1
0
+1
0
+1
0
+1
0
+1
0
+1
0
+1
0