Учуутал күнэ хас биирдиибитигэр оҕо сааспытын санатар, оскуолатааҕы сылларбытын эргитэр истиҥ күн.
Уус Алдан улууһугар олорор, идэлэрин эҥкилэ суох билэр, үөрэх-билии кыһатыгар сыраларын уурбут аҕам саастаах, үтүө холобур буолар бэтэрээн учууталларбытыгар уонна кэми кытта тэҥҥэ хардыылыыр, айымньылаахтык үлэлии сылдьар бары учууталларга эҕэрдэ ыытабыт, баҕа санаабытын тиэрдэбит.
Эһиги оҕо-аймахха, норуокка өрүү күндү, чугас дьон буолаҕыт, дэгиттэр сайдыылаах, аныгы олоххо бэлэмнээх, киэҥ билиилээх, дойдуга бэриниилээх, оҕо кэлэр кэскилин сирдиир, кылааты киллэрсэр, сыралаах үлэҕитинэн олук уураҕыт, тирэх буолаҕыт.
Быйыл соһуччу кэлбит хоруона хамсыгын утаран, бары сомоҕолоһон, үлэни-хамнаһы өссө күүһүрдэн, тэтимирдэн биэрбиккит үтүө холобур буолар. Күүстээх санаа, эрчимнээх ылсыы, бигэ тирэх. Бу барыта эһиги, ытык-мааны учууталларбыт. Билии киэҥ аартыгар сирдиир күндү дьоммут, этэҥҥэ буолуҥ, чэгиэнник сылдьыҥ!
Үрдүккэ, сырдыкка көтүтүҥ!
Үтүөнү — кэрэни үксэтиҥ!
Уот сулус буолаҥҥыт,
Үөрэххэ — билиигэ
Угуйа туруҥ!
Ситиһиилээх үлэнэн
Үйэттэн үйэҕэ уруйданыҥ!
Эҕэрдэни кытта Сергей Степанович Васильев-Борогонскай аатынан
улуустааҕы бибилэтиэкэ кэлэктиибэ.
Уус Алдан