Олунньу 22 күнүгэр Бүлүү улууһугар “Учуутал – эр киһи идэтэ” идэни үрдэтиигэ өрөспүүбүлүкэтээҕи үһүс куонкурус ССРС норуодунай учуутала Михаил Алексеевка ананна. Куонкуруһу СӨ үөрэҕириитин уонна наукатын министиэристибэтэ, С.Н.Донской- II аатынан үөрэхтээһини сайыннарыы уонна идэни үрдэтии института, Бүлүүтээҕи үөрэх управлениета тэрийдилэр.
Бу бырайыак ааптарынан Халбаакы оскуолатын английскай тылга учуутала Раиса Григорьева буолар. Оскуола дириэктэрэ Гавриил Иннокентьев бэлиэтииринэн, бу куонкурус эр дьон учууталынан үлэлииллэрин көҕүлүүр.
Бүлүүлэр көҕүлээһиннэрэ 2017 с. Арассыыйа үөрэҕин миниистирэ Ольга Васильева Арассыыйа оскуолаларыгар эр дьон-педагогтары үлэлэтиэххэ наадатын ыйбыт сорудаҕар сөп түбэһэр. Итинник холобуру Туваҕа туһаналлара кэрэхсэммитэ.
“Эр киһитэ суох оскуола – “толорута суох ыалга” тэҥнээх. Эр киһитэ суох эр киһини иитии олох сөбө суох. Маннык луозуну үһүс куонкурус кыттыылаахтара туруорбуттара.
Куонкуруска араас оройуоннартан 20 учуутал кытынна. Куонкуруһу Наталья Семенова салайааччылаах жюри сыаналаата.
Куонкурус түмүгүнэн маннык миэстэлэри анаатылар:
Үөһээ Бүлүү улууһун Д.С.Спиридонов аатынан Үөһээ Бүлүүтээҕи 4 №-дээх оскуола историяҕа уонна географияҕа учуутала Егор Ильин муҥутуур кыайыылааҕынан буолла.
I степеннээх лауреат – Алексей Иванов, Бэрдьигэстээхтээҕи А.Н.Осипов аатынан кэккэ биридимиэттэри дириҥэтэн үөрэтэр оскуола алын сүһүөх кылаастарын учуутала;
II степеннээх лауреат – Бүлүү улууһун Бөкчөҥө оскуолатын географияҕа учуутала Петр Калачев;
II степеннээх лауреат — Бүлүү улууһун Г.С.Донской аатынан Бүлүүтээҕи 2 №-дээх оскуола физикаҕа уонна математикаҕа учуутала Владимир Софронов.
Анал номианциялар иҥэрилиннилэр:
“Креативность, интеллект уонна талаан” – Ньурба оройуонун Н.Н.Чусовской аатынан Антоновка оскуолатын физкултуураҕа учуутала Петр Осипов;
“Сформированность аналитических и мыслительных компетенций” – Бүлүү улууһун П.И.Быканов аатынан Халбаакы оскуолатын физкултуураҕа учуутала Алексей Васильев;
“Айар сыһыан, идэни баһылааһын” – Уус Маайа оройуонун Петропавловскай оскуолатын саха тылыгар учуутала Андрей Алексеев;
“Эрудит-учуутал” — Үөһээ Бүлүү улууһун И.Барахов аатынан Үөһээ Бүлүүтээҕи 1 №-дээх оскуола технологияҕа учуутала Альберт Васильев;
“Идэҕэ бэриниитин иһин” – Аллайыаха оройуонун Чокуурдаах оскуолатын физкултуураҕа учуутала Олег Садовников .
Бары кыттааччыларга сертификаттар уонна дипломнар туттарылыннылар.
Татьяна Федорова, Валентина Таппагарова, Бүлүү улууһун П.И.Быканов аатынан Халбаакы орто оскуолатын учууталлара.
