Учуутал-буойун Афанасий Габышев күннүгүттэн

Ааптар: 
Бөлөххө киир:

Хос эhээбит Габышев Афанасий Лазаревич – сэрии ветерана, учуутал-буойун.

Эhээбит сэрии туhунан суруйбут тэтэрээтиттэн кылгастык билиһиннэрэбит. Хайдах суруйбутунан бэчээттиибит:

«…1941 сылга сайын сэрии саҕаланыытыгар Мэнэ — Бороҕон диэн суолу тута, билиҥҥи Балыктаах бөhүөлэк халдьыы суолун тута сылдьар этибит.
1943 с. саас ыам ыйыгар Аҕа дойду иhин хаан тохтуулаах улуу хапсыhыыга ынырыллан барбытым. Төңүлү эбэттэн Майанан Якутскай куоракка тиийэн, «В. Молотов» теплоходка олорон киэн Лена өрүс баhыгар Уус Кут куоракка тиийэн массыыналарынан Ангара өрүскэ турар Ангарск диэн кыра куоракка тохтообуппут. Барыта Саха сириттэн 600 — 700 киhи быhыылааҕа. Аара айаннаан иhэр дьон ортолоругар олус кэрэхсэбиллээх солуннаах дьон, эңин араас талааннаах, дьоҕурдаах, бэрт быhый, бөҕө ыччаттар баар этилэр. Сорохпутун Арҕаа фроҥҥа, сорохпутун Илиҥҥи границаҕа атаартаабыттара. Мин Илин границаҕа барар буолбутум, ол диэки барааччылар 80 киhи этибит. Иркутскай куораттан арахсыбыппыт, элбэх эдэр дьон дойдуларыгар эргиллибэтэхтэрэ, кыргыhыы толоонугар охтубуттара. Биhиги группабытын 20-лии киhинэн араарбыттара. Мин Забайкальскай фронт 10-с Армиятыгар бас бэринэр 174-с минометнай полкатыгар минометчигынан службалаабытым. Күhүн сэтинньи ыйга Комсомолга киирбитим. Фашистскай Германия биир куомуннааҕа Империалистическай Япония үгүс ахсааннаах Квантунскай Армиятын утары сэриигэ кыттыбытым, 1945 сыл атырдьах ыйын 9 кунэ буолар түүнүгэр түүн 1 чааска дойдубут границатын туораабыппыт, сэрии ый кэриҥэ буолбута, Квантунскай Армия бэриммитэ. Сэрии олус уустук усулуобуйаҕа уонна ордук өhөс өстөөҕү утары барбыта. Хас да төгүл аналлаах сорудахтары толорорго бара сылдьыбытым. Сэриигэ сылдьар киhиэхэ «чэпчэки» диэн суох буолааччы, онон ылбыт сорудах барыта кыргыhыынан түмүктэнэр буолара. Сэрии бүппүтүн кэннэ 1945 -1947 сс диэри Корейскай Народнай Демократическай республикатын столицатыгар Пхеньян куоракка
Советскай сэриилэр кэккэлэригэр 474 зенитнай полкатыгар службаҕа сылдьыбытым. Дойдубар 1947 с кулун тутар ыйга эргиллэн кэлбитим.
Бииргэ сылдьыбыт биир дойдулаахтарым барыта 5 киhи этибит — Жирков Дмитрий Софронович, Габышев Афанасий Лазаревич, Бурнашев Андрей Васильевич, Сотников Андрей Ильич, Иванов Гавриил Егорович, бары мэнэ  хаҥаластар.
Дойдубар төннөн кэлбитим, сотору буолан баран колхоз комсомольскай тэрилтэтин комитетыгар быыбардаммытым, полит. кружокка пропагандистыырым. Онтон 1951 сылтан ыла учительскай үлэҕэ сылдьан 1957 с. диэри Таракка начальнай полит. кружокка эмиэ пропагандистаабытым. Төҥүлү нэhилиэгэр агит. пуунугар начальник быhыытынан үлэлэппиттэрэ. Бу үлэлэр көннөрү сүрүн үлэ тас өртүнэн бэриллэр үлэнэн ааҕыллаллара. 1960 сылтан ССКП чилиэнэбин. 1951 сылтан Төнүлү орто оскуолатын учууталабын»

Афанасий Лазаревич Габышев сэрииттэн кэлэн баран эйэлээх олоххо үлэ үөhүгэр түспүтэ. Саатын, автоматын ууран баран, илиитигэр уруучука ылан оҕолору, ыччаттары үөрэтиигэ олоҕун анаабыта, кини 25 сыл Төңүлү орто оскуолатыгар учууталлаабыта. Олорон ааспыт олоҕун билигин оҕолоро, сиэннэрэ, хос сиэннэрэ салгыыллар. Дьоhун киhи суола-ииhэ суох сүтэн хаалбат.

Ахтыыны суруйдулар хос сиэннэрэ Айта Чахова Төңүлү орто оскуолатын 3 «а» кылаас үөрэнээччитэ уонна Егор Попов Төңүлү орто оскуолатын 6 «а» кылаас үөрэнээччитэ.

+1
0
+1
0
+1
0
+1
0
+1
0
+1
0
+1
0