Маны аах Уопсастыба

Бастыҥ учуутал саайтыгар киир, аах, туһан

Калмыкияттан төрүттээх Роман Николаевич Оконов Уус Алдан улууһун Суотту орто оскуолатыгар устуоруйа уонна обществознание учууталынан үлэлээбитэ сэттис сыла буолла. Кини былырыын өрөспүүбүлүкэ иһинэн ыытыллыбыт “Сыл учуутала-2019” күрэскэ бастаан, билигин Арассыыйа таһымыгар Саха сирин чиэһин көмүскүү сылдьар.

Буола турар быһыынан-майгынан сибээстээн, күрэс сирэй көрсөн ыытыллара уустуктардаах, ол эрээри номнуо маҥнайгы түһүмэҕэ кэтэхтэн буола турар. Күрэскэ туох да мэһэйдээбэтэҕинэ, 2021 сыл тохсунньу 23 – олунньу 3 күннэригэр ыытыллара былааннанар. Аһаҕас уруок, методика сэминээрэ, кылаас чааһа уонна маастар-кылаас көрдөрүүттэн турар түһүмэхтэрдээх.

Күрэс маҥнайгы түһүмэҕин усулуобуйата – учуутал интэриниэт саайтын нөҥүө идэтин толору арыйыы. Манна кыттааччы бэйэтин аатынан саайт арынан, билиитин-көрүүтүн толору көрдөрүөхтээх эбит.

Роман Николаевич romanokonov.ru саайтыгар киирэн учуутал, үөрэнээччи, төрөппүт эбэтэр устуоруйанан үлүһүйээччи киһи элбэх интэриэһинэйи билиэн сөп.

Саайт манньыат уобараһынан оҥоһуллубут. Оттон былыргы манньыат харчы эрэ буолбакка, бүтүн олох хаамыытын кэрэһитэ буолар суолталаах. Онон устуоруйа учуутала бэйэтин иитэр-үөрэтэр ньымаларын манньыат чаастарынан бэлиэтээбит.

Саайтка киирбит киһи хайаан даҕаны бэйэтигэр туһалааҕы уонна саҥаны билэрэ саарбаҕа суох. Бу тустаах биридимиэт учууталларыгар эрэ буолбакка, туһанааччы киэҥ араҥатыгар ананар. Холобура, физика учуутала даҕаны, кылаас салайааччыта даҕаны бу саайтка идэлэригэр сөп түбэһэр олус туһалаах сүбэни ааҕыахтарын сөп.

Үөрэнээччи устуоруйа уонна обществознание биридимиэттэригэр эксээмэни туттарбат буоллаҕына даҕаны, бу саайтка киирэн Роман Оконов ютуб-каналыгар уһулбут видеоларын көрөн сүбэлэри ылыан сөп.

Салгыы улуустарынан таҥыллыбыт Саха сирин каартата баар. «Бу каартаны “Мин Сахам сирэ” диэн ааттыыбын уонна сылдьыбыт улууспун бэлиэтээн иһэбин. Манна улуус олоҕор-дьаһаҕар сыһыаннаах информацияны киллэрбитим.

Төрөппүттэргэ аналлаах олус туһалаах матырыйааллар өйдөтүнньүк (памятка) быһыытынан бааллар: интэриниэккэ сэрэхтээх буолуу, оҕо быраабын, баһаартан сэрэхтээх буолуу туһунан о.д.а. Ону таһынан, билигин аан дойдуга тыҥаан турар оҕоҕо кинигэни аахтарыы кыһалҕатыгар өйдөтүнньүк баар.

Оттон устуоруйа халандаара бүгүҥҥү күн туох бэлиэ суолталааҕын кэпсиир. Итиэннэ нэдиэлэҕэ биирдэ үөрэххэ, оскуолаҕа сыһыаннаах сонуннары таһаарбын,» — диэн үөрэх эйгэтигэр туһалаах саайтаах эдэр кэскиллээх учуутал Роман Николаевич Оконов иһитиннэрэр.

Сыл бастыҥ учууталын саайтын ааҕыҥ, туһаныҥ, санааҕытын үллэстиҥ диэн ыҥырабыт.

Надежда ИЛЬИНА, edersaas.ru

8
0
Telegram @edersaas20

Добавить комментарий