СӨ үөрэҕин уонна наукатын миниистирэ Михаил Сивцев “Дистанционнай учуутал” диэн бырагыраама үлэлээн эрэрин туһунан иһитиннэрдэ.
“СӨ Үөрэҕи сайыннарар уонна идэ таһымын үрдэтэр институт баазатыгар “Дистанционнай учуутал” бырагырааманы үлэлэттибит. Бары оскуолаларга, улуустарга төлөпүөн нүөмэрин ыыппыппыт. Ыйыллыбыт нүөмэргэ төлөпүөннээн, учууталы дистанционнай көрүҥүнэн солбуйар кыахтаах учуутал баарын дуу, суоҕун дуу туһунан ыйыталаһыахтарын сөп”, — диэн миниистир быһаарда.
Итини таһынан, сэтинньи 15 күнүттэн педагогическай идэлэргэ үөрэнэр, билигин нэһилиэнньэлээх пууннарга баар устудьуоннар оскуолаларга тахсан учууталларга көмөлөһүөхтэрин эттэ. Маннык көмө уһуйааннарга эмиэ оҥоһуллуоҕун иһитиннэрдэ.
Санатан эттэххэ, былырыыҥҥыттан педагогическай идэлэргэ үөрэнэр үрдүкү куурус устудьуоннара оҕолору үөрэтэллэрэ сокуонунан бигэргэммитэ. Онон билиҥҥи курдук дьаҥ кэмигэр табыгастаах бырагырааманы тобулбуттар.
Людмила ПОПОВА, “Саха сирэ” хаһыат, edersaas.ru
Хаартыска: ГТРК Самара.