Орнитологтар 2022 сылга алтан хараҕы (пискульканы) үөрэтиигэ уонна харыстааһыҥҥа АЛРОСА хампаанньа өйөбүлүнэн ыытыллыбыт научнай-чинчийэр үлэ түмүктэрин таһаардылар. Алтан харах олох сэдэх уонна эмсэҕэ көрүҥнэргэ киирсэр, ураты харыстабылга сылдьар уонна Саха сирин Кыһыл кинигэтигэр киллэриллибитэ.
АЛРОСА Экологияҕа киинин уонна РНА Сибиирдээҕи салаатын криолитозона биологическай кыһалҕаларыгар институтун икки ардыларыгар түһэрсиллибит дуогабар чэрчитинэн, орнитолог-учуонайдар Мууна өрүскэ алтан хараҕы үөрэтэ барбыттара. АЛРОСА бырамыысыланнай эбийиэктэрин таһыгар баар сирдэргэ сэдэх көтөр туругун сыаналыыр соруктаахтара. Тоҕо диэтэххэ, бу көтөрдөр уйа туттар сүрүн сирдэриттэн биирдэстэрэ Удачнайдааҕы Хайа-байытар кэмбинээт Үөһээ Мууна сириттэн чугас. Учуонайдар ону таһынан хаас бу көрүҥүн харыстыыр стратегияны оҥорорго үлэлээтилэр.
Сыл устата ханна көһөллөрүн уонна уйалара баар учаастактарын быһаарарга Druid 10GSM-передатчигын туһаммыттара. Передатчиктары саастаах уонна эдэр көтөрдөргө иилбиттэрэ. Бу тэриллэр көтөрдөргө табыгаһа суох туругу үөскэппэттэр уонна сиргэ да, салгыҥҥа да көҥүл сылдьалларыгар мэһэйдээбэттэр. Барыта алта передатчик:, икки -– хоҥор хааска, икки көҕөҥҥө иилилиннэ.
2022 сыл эспэдииссийэтин түмүктэринэн сабаҕалаатахха, көтөрдөр ахсааннара, урукку чинчийиилэри кытары тэҥнээтэххэ, туруктаах. Мууна өрүскэ 140 килэмиэтир устатыгар учуонайдар алтан харах алта ийэ ууһун регистрациялаатылар.
Чинчийиилэр көрдөрбүттэринэн, өрүс үөрэтиллибит учаастагар хаас ахсаана элбэх уонна инникитин өссө да сиһилии үөрэтиини эрэйэр. Ону таһынан чинчийиилэр тулалыыр эйгэҕэ АЛРОСА үлэтэ куһаҕаннык дьайарын булбатылар, ол фауна арааһынан уонна Кыһыл кинигэҕэ киирэр көрүҥнэр баалларынан бигэргэнэр.
Сыл аайы ыытыллар уһун кэмнээх научнай мониторинг тулалыыр эйгэҕэ тахсыан сөптөөх уларыйыылары кэтээн көрөр уонна үлэ хайысхатын ордук эрэллээх стретегиятын тутуһарга көмөлөһүөҕэ.
АЛРОСА учуонайдар чинчийии ыыталларыгар 3 мөлүйүөн кэриҥэ солкуобайы ыытта.
ЫСПЫРААПКА: Өлөр-сүтэр кутталга киирбит алтан харах Айылҕа харыстабылын аан дойдутааҕы сойууһун Кыһыл кинигэтигэр, СӨ Кыһыл кинигэтигэр киирбитэ. Көтөр бу көрүҥэ сүтэр төрүөтэ уонна кыстыыр сирдэрэ билиҥҥэ диэри быһаарылла илик.
«Саха сирэ», edersaas.ru анаан АЛРОСА пресс-сулууспата.