Тыа хаһаайыстыбатын министиэристибэтигэр өртөөһүн от хаачыстыбатыгар дьайыытын туһунан кэпсэтии буолан ааста.
edersaas.ru
Уһук хотугу сиргэ өртөөһүн ходуһаны уонна мэччирэҥи кур оттон ыраастаан, үүнүүнү үрдэтиигэ, онон сүөһүнү-сылгыны иитиигэ улахан суолталаах.
Сэтиэнэхтээх уонна кур лаҥха буолбут сирдээҕэр сыллата оттонор ыраас ходуһа үүнүүтэ быдан үрдүк буолар. Ити эрээри, үүнүү сыл аайы биир буолбат, сорох сыл курааннаан, ходуһа кытыыта оттоммокко хаалан, эһиилигэр сэтиэнэҕинэн бүрүллэрэ баар суол.
Уот турар куттала баарыттан, тыа саҕатыгар уонна чугас ойуурдаах ходуһаҕа, сыһыыга өртөөһүн сокуонунан бобуллар. Көҥүллэнэр да түбэлтэтигэр, олохтоох дьаһалта быһаарыытынан, тыала-кууһа суох күҥҥэ, баһаартан сэрэхтээх буолуу ирдэбиллэрин толору тутуһан, тустаах учаастак тула өттүн тыраахтарынан хорутан, кэтээн көрөөччүлэри туруоран, быһата эрдэттэн бэлэмнэнэн, өртөнөр болдьоҕо уонна сирэй эппиэттээхтэрэ ыйыллыбыт буоллаҕына, көҥүл бэриллэр.
М.Г.Сафронов аатынан ССТХНЧИ дириэктэрэ Айаал Степанов иһитиннэрбитинэн, институт учуонайдара Хаҥалас улууһугар Алар уонна Хочо диэн учаастактарга өртөөһүн сиргэ, кини үүнүүтүгэр, химическэй састаабыгар, ходуһа уонна мэччирэҥ быһыытынан туттуллуутугар уо.д.а. хайдах сабыдыаллыырын үөрэтэ сылдьар эбиттэр. Саас эрдэ, сир сииктээҕэр өртөөтөххө, уот турар куттала аччыырын итиэннэ почва быйаҥнаах араҥата эмсэҕэлээбэтин, ол түмүгэр үүнүү үрдүүрүн өссө төгүл чиҥэтэн дакаастаабыттар.
Раиса Сибирякова, «Саха сирэ» хаһыат, edersaas.ru