Бу күннэргэ өрөспүүбүлүкэ түөрт үрдүк үөрэҕин кыһатын: агротехнологическай университет, мэдиссиинискэй институт, Чурапчытааҕы физическэй култуура уонна успуорт, Ускуустуба Арктическай институттарын учуонайдара, преподавателлэрэ, устудьуоннара биэс күннээх тымныыга уонна чөл олоххо туһаайыллыбыт «Тымныы уонна доруобуйа» сэминээри бэрт үрдүк таһымнаахтык тэрийэн ыыттылар.
Тэрийээччилэр сэминээри Өймөкөөн улууһугар тиийэн түмүктээтилэр. Тоҕо чуолаан маннык быһаарыыны ылбыттарын туһунан сэминээри ыытыыга бас-көс киһи Ульяна Винокурова санаатын бу курдук үллэһиннэ уонна Өймөкөөн улууһугар ыытыллар үбүлүөйдээх тэрээһиҥҥэ сыанабыл биэрдэ:
— Тымныы диэн биһиги өрөспүүбүлүкэбитигэр бэлиэ көстүү. Бу күннэргэ Дьокуускайга ыытыллыбыт норуоттар икки ардыларынааҕы научнай-практическай сэминээрбитин Тымныы полюһугар кыһыҥҥы туризм бэстибээлинэн түмүктээбиппит мээнэҕэ буолбатах. Өскөтүн бастакы сылларга кыһыҥҥы туризм бэстибээлэ «Өймөкөөн улууһа — тымныы чыпчаала» диэн өйдөбүлгэ олоҕуран ыытыллар эбит буоллаҕына, кэлиҥҥи сылларга бу суолталаах тэрээһин олус дириҥ ис хоһоонноммутун бэлиэтиир тоҕоостоох. Ол курдук, мин тус бэйэм учуонай быһыытынан кэтээн көрүүбүнэн, Өймөкөөн улууһун олохтоохторо Тымныыга сыһыаннарын тосту уларыпыттар — «Тымныыны харыстыахха наада» диэн толкуйдаммыттар. Бу баар бэстибээли 20 сылы быһа ыытыы — сыралаах үлэ түмүгэ! Өймөкөөн улууһа Тымныы полюһун быһыытынан аны билигин Тымныыны харыстааччы курдук бэйэтин көрдөрөр буолбута — хайҕаллаах суол.
Ол курдук, Томторго киирии аан аартыкка «Томтор — Тымныыны харыстааччы» («Хранитель холода — Томтор») диэн сүүнэ улахан суругу-бичиги олус сэргии көрдүм. Маннык сыһыан баарын тухары Сир Ийэбит тутула Тымныы туругуттан быһаччы сибээстээҕин көрдөрөр.
Ити курдук, Наука уонна Чэбдигирии сылын чэрчитинэн Өймөкөөн улууһугар ыытыллыбыт үбүлүөйдээх бэстибээлгэ учуонайдар кыттыыны ылан, тэрээһин Алыһардаах күөлүгэр чэбдигирии хайысхалаахтык ыытыллан, бэрт дириҥ ис хоһооннонно.
Елена ПОТОЦКАЯ, «Саха сирэ» хаһыат, edersaas.ru