Өймөкөөн улууһун 437 N-дээх Үчүгэйдээҕи быыбардыыр учаастага бэҕэһээ, бэс ыйын 25 күнүгэр, РФ Төрүт Сокуонугар уларытыылары киллэриигэ куоластааһыны көхтөөхтүк саҕалаата.
Үчүгэйдээҕи быыбардыыр учаастакка уопсайа 220 куоластааччы баар. Бу, ыраах хоту сытар, уустук суоллааҕынан-иистээҕинэн уратылаах учаастак буолар. Онон, куоластааһын эрдэттэн саҕаланан, бастакынан табаһыттар уонна сылгыһыттар куоластаатылар.
—Ыстаадаҕа бэҕэһээ бөртөлүөтүнэн бара сылдьыбыттара. Учаастактааҕы быыбардыыр хамыыһыйа үлэһиттэрэ 1, 2, 6, 7. 8 , 10 N-дэрдээх уопсайа 6 таба ыстаадатын кэрийдилэр, 27 киһи куоластаата. Ону таһынан, сиринэн 43 киһини – метеостанция үлэһиттэрин, сылгыһыттары уонна мостовиктары куоластаттылар. “Труднодоступнайынан” куоластатан, билигин бөһүөлэккэ куоластааһын хаалла, — диэн иһитиннэрдэ волонтер, Үчүгэйдээҕи орто оскуола химияҕа учуутала Ньургуйаана Прокопьевна НАХОДКИНА.
Оттон Үчүгэйдээҕи этнокультурнай киин дириэктэрэ, волонтер Аяна Прокопьевна ЭВЕРСТОВА:
—Хамыыһыйаҕа 4 киһи үлэлиир, ону таһынан 3 кэтээн көрөөччү, 2 волонтер уонна 2 киһи дьаһалтаттан бааллар. Куоластааһын күн аайы уулуссаларынан араарыллан барар. Прописката суохтар открепительнай ыланнар, эмиэ көхтөөхтүк куоластаан эрэллэр, — диэтэ.
Волонтердар эбээһинэстэригэр нэһилиэнньэни информациялааһын эмиэ киирэр. Мин Үчүгэй волонтердарын кытта Уус Алдан Түүлээҕэр олорор биһиги ааптарбыт, олоххо бэрт көхтөөх, айар куттаах Полина Находкина – Полина Победа көмөтүнэн сибээстэһэ сырыттым. Полина Победа дьоно онно олороллор.
“Үчүгэйгэ куоластааһын тэрээһиннээхтик, үчүгэйдик баран иһэр, күн-дьыл туруга этэҥҥэ, дьон көхтөөх. Биһиги билигин кэтээн көрөөччү быһыытынан сылдьабыт”, — дииллэр волонтердар.
Үчүгэйгэ олорор сиринэн, тэрилтэнэн куоластыыр графиктара оҥоһуллубут, онон, дьон мустубат усулуобуйата тэриллибит. Санитарнай инвентарынан хааччыллыы эмиэ үчүгэй.
Быыбардыыр учаастак бэс ыйын 25-тэн бэс ыйын 30 күнүгэр диэри сарсыарда 10 чаастан киэһэ 18 чааска диэри, от ыйын 1 күнүгэр сарсыарда 8 чаастан киэһэ 20 чааска диэри үлэлиир. Онон, дьон бэйэтигэр табыгастаах бириэмэтигэр кэлэн куоластыыр.
Бастакы уонна иккис күн бастакы аҥаарынааҕы туругунан, нэһилиэнньэ 35 бырыһыана куоластаата.
Куоластааһын салҕанар.
Сүрүн хаартыскаҕа: Быыбар хамыыһыйатын чилиэннэрэ ыстаадаҕа кэллилэр.
Татьяна МАРКОВА.