Ааспыт 2017 сылы Саха сиригэр Ил Дархан ыйааҕынан Ыччат сылынан биллэриллибитэ. Ыччат сыла хайдах ааспытын туһунан сылы түмүктүүр уопсай тэрээһиҥҥэ Ыччат дьыалаларын уонна дьиэ кэргэн бэлиитикэтин миниистирэ Афанасий Семенович Владимиров санаатын маннык үллэһиннэ:
— Ыччат сыла саҕаланыытыгар туруоруллубут сыал-сорук ситиһилиннэ. Сыл устата ыччакка анаммыт үлэ киэҥ хабааннаахтык ыытылынна. Маныаха хас биирдии оройуоннар, уопсастыбаннай түмсүүлэр бары этиилэрин киллэрдилэр. Саҥа сокуоннар көрүлүннүлэр, ол курдук, оҕо уонна добровольчество сокуоннарын бырабыыталыстыба мунньаҕар ырыттылар. Судаарыстыбаннай ыччат бэлиитикэтин сокуонугар уларыйыылар киирдилэр, патриоттары иитиигэ үп көрүлүннэ, онно бары оройуоннар бырагыраама ылынан үлэлээтилэр. Саха сирин ыччата норуоттар икки ардыларынааҕы, Арассыыйатааҕы күрэхтэһиилэргэ ситиһиилээхтик кытыннылар. Өрөспүүбүлүкэбит иһигэр ыытыллар ыччат бэлиитикэтин үлэтин федеральнай таһымҥа бэлиэтээтилэр. Саха сирин уопсастыбаннай түмсүүлэрэ Уһук Илиҥҥэ биир бастыҥнык үлэлиир түмсүүлэр кэккэлэригэр киирдилэр. Ыччат бырабыыталыстыбата Арассыыйа субъектарыттан бастыҥ үлэлээҕинэн сыаналанна. Аны быйыл ыччат граҥҥа, субсидия ылыытыгар көхтөөхтүк кытынна. Ыччат түөрт түмсүүтэ РФ бэрэсидьиэнин граныгар тигистэ. Алтынньыга Сочига ыытыллыбыт Аан дойдутааҕы ыччат уонна устудьуоннар бэстибээллэригэр ситиһиилээхтик кытынныбыт. Манна биһиги ыччаппыт аан дойду ыччатыгар Саха сирин киэн тутта ааттатта. Ол курдук, ыытыллыбыт кэпсэтиилэргэ көхтөөхтүк кытынна, спорт национальнай көрүҥэр анал былаһаакка, быыстапка тэрийдэ. Ол кэнниттэн Бүтүн Арассыыйатааҕы устудьуоннар этэрээттэрин слеттарын Дьокуускайга тэрийдибит. Ыччат сылыгар үлэлээбит дьоҥҥо махтанабыт, Ыччат сыла этэҥҥэ түмүктэммитинэн эҕэрдэлиибин. Саха сирин кэскилигэр уруй-айхал!
Айтана АММОСОВА, «Саха сирэ» хаһыат, edersaas.ru