Бэс ыйын 25 күнүттэн Төрүт Сокуоҥҥа уларыйыылары киллэрэргэ куоластааһын саҕаланна. Куоластааһын сэттэ күн устата буолуоҕа. Тоҕо диэтэр, бу миэрэ элбэх киһи мустубатыгар, ыарыыга сыстыбатыгар туһуланар.
edersaas.ru
Куорат 804 №-дээх быыбардыыр учаастагар тиийэн, коронавирустан харыстанар миэрэлэри хайдах тутуһалларын көрдүм, биллим.
Тас аан аттыгар харыстанар көстүүмнээх үлэһит көрсөн, ыраахтан сүүскэр даҕайан, кыраадыскын кээмэйдиир. Иһирдьэ киирдэххинэ, илиигэр, таҥаскар антисептик ыстараллар, бэрчээкки, мааска, уруучука биэрэллэр.
Салгыы ыйар бэлиэлэри батыһан, куоластыыр саалаҕа киирэҕин. Аадырыскын ыйыталлар, онтон пааспаргын арыйан көрдөрөҕүн, сурунаалга илии баттыыгын. Бэйэҥ уруучукаҕын да илдьэ сылдьыаххын сөп. Быыс иһигэр киирэн, бүлүтүөҥҥэр “сөбүлэһэбин”, эбэтэр “сөбүлэспэппин” диэн бэлиэ туруораҕын, онтон анал дьааһыкка угаҕын. Уруучукаҕын хаалларарга туспа остуол, дьааһык бэлэмнээбиттэр. Саалаҕа быыбардыыр хамыыһыйа чилиэттэриттэн ураты, полиция үлэһитэ, кэтээн көрөөччүлэр бааллар, камера үлэлиир.
Куоластыы кэлэр киһи аҕыйах эрээри, тиһигин быспакка, биирдиилээн кэлэ тураллар. Онон атын дьоннуун алтыһыы, уочараттааһын суох. Киирэн баран, эмиэ ыйар бэлиэлэринэн сирдэтэн, атын аанынан, көрүдүөрүнэн таһырдьа тахсаҕын эбит. Үлэһиттэр этэллэринэн, бастакы күн эбиэккэ диэри 40-ча киһи кэлэн куоластаабыт.
Ангелина Васильева, “Саха сирэ” хаһыат, edersaas.ru
Ааптар түһэриилэрэ.