Убаанньыттарга чэпчэтиилэр көрүлүннүлэр

Бөлөххө киир:

Ил Дархан Айсен Николаев бүгүҥҥү мунньаҕар дьаҥ-дьаһах кэмигэр бэйэ дьыалатынан дьарыктанар дьон ордук оҕустарбыттарын, төһө да ыарахаттар үөскээбиттэрин иһин билигин өрөспүүбүлүкэ сайдыытыгар үгүс предприниматель үлэлии-хамсыы сылдьарын бэлиэтээтээн туран, дьоҕус бизнеһи өйөөһүҥҥэ сүрүн болҕомтотун уурбутун эттэ.

– 2023 сылга диэри тэрилтэлэр дьиэҕэ-уокка төлүүр нолуоктара уруккунан хаалыаҕа, кадастровай сыананан нолуок эһиилгиттэн киириэҕэ. Ону сэргэ предпринимателлэргэ көмө буоллун диэн, судургутуллубут нолуок систиэмэтин ыстаапкатын намыһатар туһунан сокуон барыла оҥоһулунна. Ол курдук, нолуок ыстаапката биэс бырыһыантан бииргэ, уон бырыһыантан 5 бырыһыаҥҥа диэри кыччыаҕа. Ити кыччааһын предприниматель ханнык категорияны талбытыттан тутулуктаах буолуоҕа. Бу судургута суох быһаарыныы, ол эрээри билиҥҥи кэмҥэ дьоҕус бизнеһи өйүүргэ саамай сөптөөх дьаһал дии саныыбын, – диэн иһитиннэрэр Айсен Сергеевич.

Итини таһынан Ил Дархан бэйэтин этиитигэр өрөспүүбүлүкэ предпринимательствотын өйүүр пуондаҕа 519 мөлүйүөн солкуобай көрүллүбүтүн, “Алмаасэргиэнбаан” устааптаах хапытаала 2 млрд солкуобайынан эбиллиэҕин туһунан иһитиннэрдэ. Баан бу үбүлээһини өрөспүүбүлүкэ экэниэмикэтин тус сыаллаах чэпчэтиилээх кирэдьииттээһиннэригэр туһаныаҕа. Ону сэргэ айти технологиянан дьарыктанар тэрилтэлэргэ 300 мөлүйүөн солкуобай көрүллүөҕэ.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0