Убаһа этэ — балтараа тыһыынча!

Бөлөххө киир:

Ааспыт өрөбүл күннэргэ эт-балык атыылаһаары «Сайсары» ырыынакка бара сырыттым. Атыы-эргиэн ырыынак тиэргэниттэн саҕаланар, Таатта, Уус Алдан, Чурапчы эмис этэ, Кэбээйи собото кыстанан турарын киһи эрэ ымсыыра көрөр. Былырыыҥҥытааҕар сыана тос курдук үрдээбитэ сөхтөрдө.

Төһө да харантыын буолбутун үрдүнэн, сибиэһэй эти, балыгы, үүт аһылыгы атыылаһаары, ырыынакка, буоларын курдук, дьон үллэҥнэс. Ким эрэ убаһа этин, сорох дьон тууһанар балыгы, хортуоппуйу, хаппыыстаны көрдүүллэр. Билигин суол сабыллан, сыана муҥутуур үрдээн турар күннэрэ диэн атыыһыттар кэпсэтэллэр. Өлүөнэ өрүһү туоруур суол сабыылааҕын да үрдүнэн, Чурапчы, Таатта, Уус Алдан ынаҕын, убаһатын этэ дэлэй. Талбыккын барытын атыылаһар кыахтааххын. Кылаабынайа, харчыгын эрэ кэрэйимэ.

Ордук убаһа этэ сыаната үрдээбитэ сөхтөрдө. Биир атыыһыт Чурапчы Болтоҥотун убаһатын этин биир киилэтин 1 500 солкуобайынан сыана­лаабыт (!!!). Дьэ бас быстар сыана. Оттон Уус Алдантан аҕалыллыбыт убаһа этин 700 – 1 000 солкуобайга атыылыыллар. Биэ этэ 500 – 600 солкуобай.

Таатта Дэбдиргэтиттэн аҕалыллыбыт биир киилэ ынах этэ 550 солкуобайтан саҕалаан 850 солкуобайга диэри атыыланар.

Ырыынакка кэлии эт көстүбэккэ дылы. Идэһэ кэмэ буолан, олохтоох эт хото атыыланар. Сибиинньэ этин сыанатын арыый үрдэппиттэр. Куорат таһынааҕы Марха бөһүөлэгин сибиинньэтин этэ диэн 450 – 500 солкуобайга атыылыыллар.

Ынах, убаһа этин атаҕынан ылааччыларга кыратык чэпчэтии оҥороллор. Онон, куорат дьоно кууһунан атыылаһаллара быдан барыстаах эрээри, уурар-хара­йар сирдэрэ суоҕуттан холодильникка, морозильникка эрэ батары ылаллар.

Убаһа хаанын икки-үс сыллааҕыта киилэтин 1 000 сол­­куобайга атыылыыр эбит буоллахтарына, билигин икки бүк үрдээбит. Киилэтин 2 000 солкуобайынан быспыттар. Ынах быара 500, сибиинньэ атаҕа 300 сол­­куобай.

Салгыы балык атыыланар эрээттэрин көрдүм. Балык арааһа элбэх. Кэбээйи соботун киилэтин 200 – 250 солкуобайынан быспыттар. Кэбээйи күөлүн аҥаардас биир собото балтараа киилэттэн тахса ыйааһыннаах. Чокуурдаах чыыра 1 200, сордоҥ 170, күндүөбэй 250 солкуобай.

Отону салапаан мөһөөччүккэ кутан атыылыыллар. Уус Маайа сугунун биир лиитирэтэ 350 солкуобай. Отон 300, хаптаҕас 250, моонньоҕон 300 солкуобай. Ол гынан баран, хайа сиртэн аҕалыллыбыттара биллибэт. Арааһа, соҕурууттан буолуо.

Атыыһыттар мантан кыһын сыана улаханнык түһүө суоҕа диэн сылыктыыллар. Онон билигин сибиэһэй эти ылан хаһаана туруҥ диэн сүбэлииллэр.

edersaas.ru

Ааптар хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0