От ыйын 12-15 күннэригэр Хаҥалас улууһун «Орто Дойду» комплексыгар «ТАБЫС» диэн Ыччат бэстибээлэ ыытыллыаҕа. Бэстибээлгэ кыттарга улуустар уонна уопсастыбаннай тэриллиилэр хамаандаларын ыҥыраллар.
Бэстибээл бырагыраамата үс хайысхалаах: дьыалабыай, спортивнай уонна култуурунай. Хас биирдии дэлэгээссийэ 25 киһилээх буолуохтаах.
Дьыалабыай бырагыраамаҕа Арассыыйатааҕы судаарыстыбаннай ыччат бэлиитикэтин эйгэтин бастыҥ үлэһитин быһаарар куонкурус эрэгийиэннээҕи түһүмэҕэ буолуо. Тэрээһин түмүгэр муниципальнай уорганнар ыччаты кытта үлэҕэ бастыҥ салайааччылара уонна исписэлиистэрэ ааттаныахтара. Кинилэр өрөспүүбүлүкэ аатыттан Арассыыйа таһымыгар күрэхтэһиэхтэрэ. Маны тэҥэ, ыҥырыылаах эксперт кэлиэҕэ уонна араас хабааннаах тэрээһиннэр ыытыллыахтара.
Спортивнай бырагыраамаҕа CrossFit-ка күрэхтэһии, туризмҥа илин-кэлин түсүһүүлэр буолуохтара. Култуурунай бырагыраама Арассыыйаҕа Тыйаатыр сылыгар ананыа. Манна «Эдэр маастар» диэн норуот айымньытын уус-уран быыстапкатыгар куонкуруска, миниатюра көрдөрүүтүгэр, гитаранан ырыаҕа ыччат күрэхтэһиэҕэ. Бу хайысхалары тустаах министиэристибэлэр иилээн-саҕалаан ыытыахтара.
Ыччат бэстибээлин чэрчитинэн «Эдэр ыал» күрэхтэһии ыытыллыаҕа. Куонкуруска уопсайа аҕыс түһүмэх ааҕыллыаҕа, кыайыылаах дэлэгээссийэ УАЗ-микроавтобуһунан наҕараадаланыаҕа.
Бэстибээл балаһыанньатын кытта манна https://minmol.sakha.gov.ru/news/front/view/id/3027163 билсиҥ.
Айтана Аммосова, «Саха сирэ» хаһыат, edersaas.ru