44 УАЗ уонна Лада Нива мааркалаах саҥа кэлбит массыыналары Дьокуускайга уонна өрөспүүбүлүкэ улуустарыгар бастакы медико-санитарнай көмөнү оҥорор мэдиссиинэ тэрилтэлэригэр тиксэриэхтэрэ.
Бу массыыналар учаастактааҕы быраастары, фельдшердэри уонна ыарыһахтары тиэйиигэ, суһал көмөнү оҥорорго, эми-тому уустук суоллаах-иистээх ыраах сирдэргэ тиэрдэргэ туһаныллыахтара.
«Доруобуйа харыстабылын маҥнайгы тиһигин модернизациялааһын бырагыраамата дойдуга улахан суолталааҕынан билиниллэр. Массыына пааркатын саҥатытыы уонна атын өйөбүл миэрэлэрэ мэдиссиинэ өҥөтүн оҥорууну тупсарарга, ханнык да ыраах сирдэргэ эмтэнии дөбөҥ уонна түргэн буоларын тупсарар», — диэтэ өрөспүүбүлүкэ вице-премьерэ Ольга Балабкина.
Вице-премьер биэс сыл устата бу бырагыраама чэрчитинэн балыыһалар 250 мөл. солк. суумаҕа 248 массыына ылыахтара, олортон 234 мөл. солк. федеральнай үбүлээһинтэн кэлэрин ыйда.
Бу иннинэ соторутааҕыта «УАЗ Патриот» массыына күлүүстэрин Арктика оройуоннарыгар баар балыыһалар ылбыттара.
«Саха сирэ» хаһыат, edersaas.ru
Хаартыска sakha.gov.ru