Соторутааҕыта батсаабынан киһи көрдөр көрө эрэ туруох курдук оһуордаах-мандардаах дьиэлэр хаартыскалара тарҕаммыта. Бу хайа сир ууһа маннык ураты көстүүлээх уруһуйдары оҥороруй диэн үгүс киһи билиэн баҕарбыта. “Сунтаардар үһү”, “Бырааттыы Тотоновтар үһү” диэн дьон социальнай ситимнэргэ үһү-бадах курдук кэпсэппиттэрэ.
edersaas.ru
Биир дойдулаахтарбыттан сураһан билбитим, Сунтаар Бордоҥор олорор уран тарбахтаах, маһы «ыллатар» уус Осип Евсеев үлэлэрэ эбит. Кини урут аармыйаҕа сылдьан уонна төрөөбүт нэһилиэгэр кулуупка өр кэмҥэ худуоһунньуктаабыт эбит. Ол кэннэ сопхуоска үлэлээн баран, бэйэтэ кэтэх хаһаайыстыбаламмыт. Билигин биэнсийэҕэ тахсан баран, сүөһүтүн көрөрүн быыһыгар, быыс-арыт булла да тутуунан дьарыктанар, уһанар. Дьиэтин таһыгар кыра дьиэ туттан, уһанар тэрилин барытын хааччынан, сакааһынан үлэлиир.
Осип Евсеев үлэлэрэ остуоруйаны кэпсиир курдук ураты дьикти тыыннаах көстүүлээхтэр. Билигин хас биирдии ыал дьиэтин ураты көрүҥнээхтик оҥостуон баҕарар. Онон сакаас кыралаан да буоллар киирэ турар. «Улахан мастарыскыайдааҕым буоллар, анаан уһаныам этэ«, — диэн этэр. Сакаас ордук маһы сиэтэн уруһуйдаммыт оҥоһуктарга киирэр. Бу маннык 80 х 120 см кээмэйдээх маска уруһуйу түөрт-биэс күн устата оҥорор. «Кэлэ-бара сылдьан оҥоробун», — диир.
Кэтэх хаһаайыстыбалаах буолан, уһун күнү быһа уһанар кыаҕа суох. Улууска ыытыллыбыт “Народные промыслы” бырагыраама чэрчитинэн 70 тыһ. солкуобай суумаҕа бырайыак көмүскээбит. Ордук сахалыы оһуордаах-мандардаах, булт-алт тиэмэтигэр оҥоһуктары оҥорор.
Осип Евсеев инники былаана киэҥ. Эбии станок ылыныан баҕарар, ону тэҥэ, улахан мастарыскыай туттар баҕалаах.
Анивера АКИМОВА, edersaas.ru