Ыам ыйын 24 күнүгэр күнүс 1 чаастан киин куорат пааркатыгар “Уһун үйэлэнии марафона” саҕаланар.
edersaas.ru
Бу марафоҥҥа 65-тэн үөһээ саастаах дьон кыттыахтарын сөп. Бу күн бары пааркаҕа хаамаллар, суруйтараллар. Ол кэнниттэн хас биирдии кыттааччы күн аайы хас килэмиэтири хаампытын “батсаап” бөлөҕөр отчуоттуур. 100 килэмиэтири хаампыт киһиэхэ бириистэри туттараллар. Сыл түмүгүнэн саамай көхтөөх кыттааччы быһаарыллар, кыайыылаах талыллар.
Бу аахсыйаны Дьокуускай к. Дууматын дьокутаата Алевтина Эверстова көҕүлээтэ. Манна кыттан, дьон күн аайы чэбдик салгыҥҥа хаама үөрэнэллэр, араас эрчиллиилэри оҥорон, доруобуйаларын бөҕөргөтөллөр. Саастаах дьоҥҥо бу олус туһалаах. Ону тэҥэ, бэйэ-бэйэлэрин кытта алтыһан, кэпсэтэн-ипсэтэн, доҕордоһон, аралдьыйаллар, олоххо тардыһыылара күүһүрэр.
Марафоҥҥа хаалыктаах хаамыынан дьарыктанааччылар кыттыһаллара биһирэнэр. Доруобуйаҕытын бөҕөргөтүөххүтүн, биир санаалаахтаргытын булан, олоххутун интэриэһинэй оҥоруоххутун баҕарар буоллаххытына, марафоҥҥа кыттыһыҥ! Эдэр дьон төрөппүттэргитин, эһэлэргитин-эбэлэргитин кытыннарыаххытын сөп.
Ангелина Васильева, “Саха сирэ” хаһыат, edersaas.ru