Уһук Илини сайыннарыы министиэристибэтэ Арктикаҕа эппиэттээҕинэн ананна
Бээтинсэҕэ, ол эбэтэр тохсунньу 18 күнүгэр, бэрэсидьиэн Владимир Путин бырабыыталыстыба бэрэссэдээтэлэ Дмитрий Медведев Арктикаҕа сыһыаннаах боппуруостары Уһук Илини сайыннарыы министиэристибэтигэр биэрэргэ этиитин өйөөтө.
edersaas.ru.
Көрсүһүүгэ Арктикаҕа судаарыстыба бэлиитикэтин олоххо киллэриигэ оҥоһуллубут этиилэр дьүүллэһиллибиттэрэ. Премьер-миниистир Арассыыйа бырабыыталыстыбатыгар Арктиканан дьарыктанар биир кэлим структура суоҕун быһыытынан, бу эрэгийиэҥҥэ сыһыаннаах боппуруостары барытын Уһук Илини сайыннарыы министиэристибэтигэр биэрэргэ эттэ.
– Саҥа министиэристибэни тэрийэргэ элбэх үп-харчы ороскуоттаныаҕа, ол иһин Уһук Илини сайыннарыы министиэристибэтин кэҥэтэн, киниэхэ Арктикаҕа сыһыаннаах боппуруостары сүктэриэххэ. Тоҕо диэтэххэ, бу министиэристибэ Уһук Илин Арктикаҕа тахсар зоналарынан дьарыктанар, онон Саха сирин уонна Чукотканы сайыннарыы син биир Арктиканы сайыннарыы буолар, – диэн бэлиэтээтэ.
Маны таһынан, Уһук Илини сайыннарыы министиэристибэтигэр Арктика боппуруостарын сүрүннүүр миниистири солбуйааччыны аныырга эттэ. Кэлин, бэрэсидьиэн Уһук Илиҥҥэ боломуочуйалаах бэрэстэбиитэлэ Юрий Трутнев Уһук Илин сайдыытын институттара – Уһук Илини сайыннарыы корпорацията, Киһи хапытаалын сайыннарыы ааҕыныстыбата, Инвестицияны тардыы уонна экспорды өйөөһүн ааҕыныстыбата – Арктиканы сайыннарыы үлэтиттэн туора туруохтара суоҕа диэбитэ.
Санатан эттэххэ, Уһук Илиҥҥи федеральнай уокурук биир саамай бөдөҥ эрэгийиэнигэр, Саха Өрөспүүбүлэктигэр, Ил Дархан Айсен Николаев 2018 сыл ахсынньы бүтүүтүгэр таһаарбыт ыйааҕынан, Арктиканы сайыннарыы уонна хотугу омуктар дьыалаларын министиэристибэтэ тэриллибитэ. Саҥа министиэристибэ өрөспүүбүлүкэ Арктикатааҕы түбэтин сайыннарыыга итиэннэ хотугу төрүт олохтоох аҕыйах ахсааннаах омуктар олохторун бигэтик сайыннарыы боппуруоһунан дьарыктаныа. Бу биэдэмистибэ эрдэ үлэлээбит Арктика дьыаларыгар судаарыстыбаннай кэмитиэти уларыта тутуу бэрээдэгинэн тэрилиннэ, миниистиринэн салайар-тэрийэр үлэҕэ баай уопуттаах, хоту дойду олоҕун-дьаһаҕын иһиттэн билэр Александр Саввинов ананан үлэтин саҕалаата.
Раиса Сибирякова, «Саха сирэ» edersaas.ru.