Уһук Илин эрэгийиэннэргэ социальнай тутууну ыытарга 53 миллиард бэриллиэҕэ
“Уһук Илин эрэгийиэннэргэ социальнай инфраструктураны оҥорууга федерацияттан 53,7 млрд солк. көрүллүөҕэ. Бу харчы тоҕус эрэгийиэҥҥэ барыларыгар тыырыллан турар. Үбүлээһин болдьоҕо көһүө суоҕа”, — диэн бэлиэтиир РФ бэрэсидьиэнин Уһук Илин эрэгийиэннэргэ бэрэстэбиитэлэ-вице-премьер Юрий Трутнев бэҕэһээ Владивостокка буолбут Уһук Илин эрэгийиэннэр сэбиэттэрин мунньаҕар.
edersaas.ru
Санатан эттэххэ, Уһук Илин эрэгийиэннэр социальнай инфраструктураларын сайыннарыыга былырыын РФ бэрэсидьиэнэ Владимир Путин Госсовет президиумун мунньаҕын түмүгүнэн бырагыраама оҥорорго сорудахтаабыта. Быйыл бэс ыйыгар РФ бырабыыталыстыбатын бэрэссэдээтэлэ Дмитрий Медведев манна туһаайан анал уураах таһаарбыта. Ол чэрчитинэн, Уһук Илин эрэгийиэннэргэ социальнай эбийиэктэри тутууга үс сыл иһигэр барыта 53,7 млрд солк. көрүллүөҕэ. Быйыл федеральнай бүддьүөттэн 21,2 млрд солк. барыаҕа. 2020 сылга диэри бу бырагырааманан 193 эбийиэк тутуллуохтаах.
Манна даҕатан, Юрий Трутнев эрэгийиэннэргэ тыырыллыбыт харчы кэмигэр туһаныллыахтааҕын эттэ. Өскөтүн ханнык эмэ биричиинэнэн тутуу уһатыллар буоллаҕына, манна көрүллүбүт харчы тута атын эрэгийиэҥҥэ утаарыллар.
“Социальнай инфраструктураны сайыннарыыга бэриллибит үбүлээһин болдьоҕун аны уһатыахпыт суоҕа. Мунньахха губернатордар былааны барытын толоруохпут диэн эрэннэрдилэр. Өскөтүн эрэгийиэн салалтата үлэтин бытаардар буоллаҕына, үбүлээһини тута атын эрэгийиэннэргэ ыытан иһиэхпит. Билигин Чукотка Камчатка, Хабаровскай эбии үбүлээһини ыларга бэлэм олороллор. Онон ханна эмэ былааны кыайан толорбот түгэннэригэр бу субъектар эбии үбүлээһини бастакынан ылыахтара,” – диэн этэр Юрий Петрович.
Саха сиригэр бу бырагырааманан 2,1 млрд солк. (ол иһигэр 1,7 млрд солк. федеральнай субсидия) суумаҕа сэттэ тутуу барыахтаах. Быйыл биһиги өрөспүүбүлүкэбитигэр Дьокуускай куорат 35 нүөмэрдээх оскуолатын, Томпо гимназиятын, Орто Халыма элбэх функциялаах спортивнай саалатын, ону сэргэ орто анал үөрэхтээһин эбийиэктэрин материальнай-техническэй базаларын хаҥатыыга 874,3 мөл. солк. көрүллүбүтэ.
Бу мунньахха Ил Дархан э.т. Айсен Николаев кытынна. Мунньахха субсидияны кэпсэтии таһынан Владивосток куоракка буолуохтаах Илиҥҥи экономическай форум туһунан кэпсэттилэр.
Аграфена КУЗЬМИНА, “Саха сирэ” хаһыат, edersaas.ru