VII Уһук Илиҥҥи экэнэмиичэскэй пуорум чэрчитинэн (ВЭФ) балаҕан ыйын 5 күнүгэр «Уһук Илин уулуссата» диэн үгэс буолбут быыстапка арылынна.
Уһук Илиҥҥэ РФ Президенин боломуочуйалаах бэрэстэбиитэлэ, вице-премьер Юрий Трутнев тыл этэригэр, эрэгийиэн дойду сайдыытыгар киллэрэр кылаатын туһунан тоһоҕолоото.
«Билиҥҥи туругунан Уһук Илиҥҥи эрэгийиэҥҥэ барыта 3 трлн солк суумалаах 2,7 тыһ. инвестиционнай бырайыак оҥоһуллар, 120 тыһ. саҥа үлэ миэстэтэ таҕыста. Быйылгы пуорум ураты. Арассыыйаны кырыы харахтарынан кынчыаттааччылар биһигини муннукка-ханныкка хаайан, сааҥсыйалара дойдубут сайдыытын атахтыылларын дакаастыы сатыыллар. Бу моһоллор биһиги өссө кыахтаах, өссө да күүстээх оҥоруохтара. Хайаан даҕаны бары биир санаанан кыайыыны ситиһиэхпит», – диэтэ Юрий Трутнев.
РФ Президенин сүбэһитэ, Пуорум тэрийэр кэмитиэтин эппиэттиир сэкирэтээрэ Антон Кобяков быыстапка туһунан санаатын маннык үллэһиннэ: «Быыстапка сыллата сайдар уонна кэпсэтии, хардарыта үлэлэһии балаһааккатынан буолла. Уһук Илиҥҥи экэнэмиичэскэй пуорум биир тутаах бырагырааматыгар кубулуйда. Араас формат нөҥүө, мультимедиа көмөтүнэн ыалдьыттарга уонна Приморье олохтоохторугар Уһук Илин эрэгийиэннэрин туһунан билиһиннэрэбит».
Быйылгы быыстапка «Арассыыйа технологическай кыайыытын туһугар тугу оҥордуҥ?» диэн лозуннаах. Инньэ гынан тастан киирэри солбуйууга, бэйэ аһыгар-үөлүгэр уонна технологическай тутулуга суох буолууга туспа болҕомто ууруллар. Уһук Илиҥҥи эрэгийиэннэр бу бырайыактарын таһынан бэйэлэрин култуураларын, тус оҥоһуктарын, минньигэс национальнай астарын билиһиннэриэхтэрэ.
Култуурунай бырагыраама чэрчитинэн күн аайы иккилии эрэгийиэн күннэрэ ыытыллар. Тиһэх күн улахан гала-кэнсиэр былааннанар.
Edersaas