Ил Дархан Айсен Николаев Санкт-Петербурдааҕы норуоттар икки ардыларынааҕы гаас форумугар Уһук Илин уонна Сибиир 11 эрэгийиэнин хабан туран, гаас уматыгын тарҕатыыга “Гаас илиҥҥэ ситимэ” диэн анал бырайыагы тэрийэргэ этии киллэрдэ.
Бырайыак чэрчитинэн, Уһук Илин уонна Сибиир федеральнай уокуруктар 11 эрэгийиэннэригэр гаас уматыгын заправкалара аһыллыахтара. Бу заправкалар массыыналары гаас уматыгынан айан былаһын тухары хааччыйыахтаахтар. Ол эбэтэр хас биирдии эрэгийиэн бэйэтин уратытын учуоттаан туран, тиэхиньикэ уматыгын эбийиэгин айан суолугар табыгастаах сиргэ туруоруохтаах.
“Бу бырайыак Уһук Илин уонна Сибиир эрэгийиэннэрин хабыаҕа. Ол курдук, бырайыакка Саха сирин таһынан Иркутскай, Кемеров, Амур, Сахалин уобаластара, Красноярскай, Забайкалье, Приморье, Хабаровскай кыраайдара, Бурятия Өрөспүүбүлүкэтэ, Еврей автономнай уобалас кыттыахтара. Бу эрэгийиэннэргэ барыта холбоон 270 мөлүйүөн туонна таһаҕас таһыыта барар. Онон эрэгийиэннэр икки ардыларыгар айан-сырыы тохтоло суох барарыгар туһалаах буолуо этэ”, – диэн бэлиэтиир Айсен Николаев.
Санатан эттэххэ, Саха сирэ гаас саппааһынан бастакы миэстэҕэ сылдьар. Гааһы хостооһуҥҥа, туһаҕа таһаарыыга “Газпром”, “ЯТЭК”, “Сахатранснефтегаз” хампаанньалар үлэлэһэллэр. Үөһээ ааттаммыт бырайыакка “АЛРОСА”, Иркутскайдааҕы ньиэп хампаанньата, “Таас-Юрях Нефтегазодобыча”, “РНГ”, “Газпром добыча Ноябрьск”, о.д.а. хампаанньалар үлэлэһэр былааннаахтар.
– Бу бырайыак судургута суох эрээри, кыаллар дьыала. РФ энергетикатын министиэристибэтин, “Газпром” хампаанньа, атын да тэрилтэлэр уонна эрэгийиэннэр көмөлөрүнэн туруоруммут сыалбытын-сорукпутун барытын ситиһиэхпит дии саныыбын. Уһук Илин уонна Сибиир эрэгийиэннэригэр гаас уматыгын заправкаларын тэрийии – тулалыыр эйгэни харыстааһыҥҥа биир сүрүн олук буолар. Онуоха биһиги эрэгийиэммит бу бырайыагы көҕүлүүр, иилиир-саҕалыыр былааннаах, – диэн этэр Айсен Сергеевич.
Аграфена КУЗЬМИНА.
СИА хаартыската.